గంటాకింత, లోకేష్ కింత... జగన్ తీవ్ర ఆరోపణలు

Posted: 06/22/2017 02:27 PM IST

వైజాగ్ భూకుంభకోణంలో తెలుగుదేశం పెద్దల పాత్రలను నిలదీస్తూ వైఎస్సార్సీపీ అధినేత జగన్మోహన్ రెడ్డి మండిపడ్డాడు. సేవ్ విశాఖ పేరుతో గురువారం నిర్వహించిన మహాధర్నాలో జగన్ మాట్లాడుతూ, మంత్రి గంటా పాత్ర ఉందని ఆరోపించాడు. భారీ ఎత్తున భూములు కొట్టేసిన కబ్జా కోరుల నుంచి భారీ ఎత్తున వసూళ్లకు పాల్పడి ఆ డబ్బులు గంటా కింత, లోకేష్ కింత లెక్కన పంపకాలు జరుగుతున్నాయని ఆయన చెప్పాడు. ల్యాండ్ పూలింగ్ పేరిట భయపెట్టి, ప్రభుత్వం సేకరిస్తే కనీసం రెండు లక్షలు కూడా ఇవ్వదని రైతులను భయబ్రాంతులకు గురి చేసి అప్పనంగా దోచేస్తున్నారని ఆయన తెలిపాడు.

గీతం యూనివర్సిటీ యజమాని చంద్రబాబుకు బంధువు కావడంతో ఆయన కబ్జా చేసిన 55 ఎకరాలను కేబినెట్ భేటీ ఏర్పాటు చేసి ఆ భూములు అధికారికంగా ఆయనకు అప్పగించారని ఆయన తెలిపారు. వైజాగ్ భూ కుంభకోణంలో టీడీపీ తీరు ఎలా ఉందంటే...రావణాసురుడు, సీతమ్మవారిని ఎత్తుకెళ్లాడా? లేదా? అన్నదానిపై కుంభకర్ణుడితో సిట్ వేయించినట్టు ఉందని ఎద్దేవా చేశాడు. రావణాసురుడు చేసిన తప్పుపై కుంభకర్ణుడితో సిట్ వేయించకుండా ఆంజనేయుడితో సిట్ వేయిస్తే నిజానిజాలు తేలిపోతాయని ఆయన చెప్పాడు. వైజాగ్ జిల్లా చంద్రబాబునాయుడుకు చాలా చేసిందని ఆయన చెప్పాడు.

మరి అలాంటి విశాఖపట్టణం జిల్లాకు చంద్రబాబునాయుడు స్కాములు, అవినీతి, దోచుకునేందుకు అనుమతులిచ్చాడని ఆయన విమర్శించాడు. భూకుంభకోణంపై వివరణ అడిగితే కలెక్టర్ హుదూద్ లో గల్లంతయ్యాయని సమాధానమిస్తున్నారని మండిపడ్డాడు. కలెక్టర్ గతంలో జీవీఎంసీ కమిషనర్ గా, జాయింట్ కలెక్టర్ గా, ఇప్పుడు కలెక్టర్ గా పని చేస్తున్నారని ఆయన తెలిపాడు. పేదలకు ప్రభుత్వం పంచి ఇచ్చిన అసైన్డ్ భూములను మంత్రుల అండతో తెలుగుదేశం పార్టీ నేతలు ఎలా దుర్మార్గంగా ఆక్రమించుకుంటున్నారో పత్రికల్లో వచ్చిన కథనాలను చూపిస్తూ నిప్పులు చెరిగి వైకాపా అధినేత వైఎస్ జగన్ కీలక వ్యాఖ్యలు చేశాడు. తెలుగుదేశం పార్టీకి వంతపాడే ఈనాడు దినపత్రికలో వచ్చిన కథనాలనే చూపిస్తున్నానని చెప్పాడు.

"చోడవరం ఎంపీపీ... గొన్నూరు వెంకట సత్యన్నారాయణ అంటే పెద్దబాబు... కొమ్మాదిలో తన పేరుతో 24.3 ఎకరాలు, తన భార్య కొండతల్లి పేరుతో మరో 25 ఎకరాలు... వాళ్ల పేర్లతో భూములు రాయిచ్చేసుకున్నారు. 'ఈనాడు' కథనం. పేపర్లో వచ్చింది. ఇది 'సాక్షి' కాదు. ఈనాడు కథనాన్ని మాత్రమే చూపిస్తా ఉన్నా" అని అన్నారు. ఆక్రమణకు గురైన పేదల భూములను తిరిగి ఇప్పించేందుకు తన పోరాటం కొనసాగుతుందని స్పష్టం చేశాడు. 'గీతం' కాలేజీలు నడిపే చంద్రబాబు బంధువు ఎంవీవీఎస్ మూర్తి, రూ. 1000 కోట్ల విలువ చేసే 55 ఎకరాలు కబ్జా చేసి, ఆ భూములను తనకు ఇవ్వాలని చంద్రబాబుకు లేఖ రాస్తే, క్యాబినెట్ లో తీర్మానం చేసి మరీ అప్పనంగా కట్టబెట్టారని దుయ్యబట్టాడు.