Posted: 03/08/2012 02:00 PM IST

        

         సినిమాల్లో బామ్మ, అమ్మగా సద్దులు చెప్పేటంలోనూ తిట్లదండకం అందుకోవటంలోనూ ఆమెకామే సాటి రాధాకుమారి(70). సినీ, నాటక రంగాల్లో తనదైన సంభాషణా చాతుర్యంతో విలక్షణ నటనను ప్రదర్శించిన ఈ అందాల బామ్మ సౌభాగ్యవతిగానే ఇవాళ అనంతలోకాలకు పయనమయ్యారు. ఈరోజు తెల్లవారుజామున గుండెపోటు రావడంతో ఆస్పత్రికి తరలిస్తుండగా, మార్గమధ్యంలోనే ఆమె అసువులుబాసారు.
          రాధాకుమారి ప్రముఖ నటుడు, రచయిత రావికొండలరావు సతీమణి. ఆమె స్వస్థలం విజయనగరం. వీరికి ఒక కుమారుడు ఉన్నారు. రాధా సుమారు 600 సినిమాల్లో నటించారు. బృందావనం, బైరవద్వీపం, ఓయ్‌, చందమామ, ఒకరికొకరు, నువ్వులేక నేనులేను తదితర సినిమాల్లో బామ్మ పాత్రల్లో ఒదిగిపోయారు.
           రావి కొండలరావు, రాధాకుమారి దంపతులిద్దరూ వెండితెరపైన కూడా పలు చిత్రాలలో భార్యాభర్తలుగా నటించడం విశేషం. నాటక రంగం నుంచి చిత్రసీమలో అడుగుపెట్టిన రాధాకుమారి నాలుగు దశాబ్దాల పాటు నటిగా కొనసాగారు. కళారంగానికి చేసిన సేవలకు గాను, ఎన్నో సత్కారాలు, అవార్డులు అందుకున్నారు. సినిమాలలోనే కాకుండా టీవీ సీరియళ్ళలో సైతం ఆమె తనదైన ముద్ర వేశారు. షూటింగులో నలుగురితోనూ కలుపుగోలుగా ఉంటూ సెట్లో ఆమె కుటుంబ వాతావరణాన్ని నెలకొల్పేవారని అంతా చెబుతుంటారు.
        మరో విషాదకర సంఘటన ఏమిటంటే, ఆమె చనిపోయిన సమయంలో భర్త రావికొండలరావు ఇంట్లో లేకపోయారు. అమెరికాలో ప్రవాసాంధ్రులు నిర్వహించే ఓ కార్యక్రమంలో సన్మానం పొందే నిమిత్తం అమెరికా బయల్దేరిన ఆయన భార్య మరణవార్త తెలిసేటప్పటికి  దుబాయ్‌లో ఉన్నారు. విషయం తెలియగానే కొండలరావు హుటాహుటిన హైదరాబాద్‌ తిరుగు ప్రయాణమయ్యారు. కొండలరావు వచ్చిన తరువాత అంత్యక్రియలు నిర్వహిస్తామని కుటుంబసభ్యులు తెలిపారు.

...avnk