Posted: 04/13/2012 06:00 PM IST

               మా ఆయన ‘బాద్షా’ సినిమాకోసం చాలా కష్టపడుతున్నారని సాక్షాత్తూ ఆ చిత్ర దర్శకుడు శ్రీను వైట్ల భార్య రూప వైట్ల తెలిపారు. ఆమె ఇచ్చిన ఒక ట్వీట్ లో ఈ విషయం వెల్లడించారు. ఇంత శ్రమ తానింతకు ముందెన్నడూ చూడలేదని కూడా రూప తెలిపారు. ఇదిలా ఉండగా, యంగ్ టైగర్ ఎన్టీఆర్-అందాల తార కాజల్ జంటగా శ్రీను వైట్ల దర్శకత్వంలో 'బాద్ షా' చిత్రం రూపొందుతున్న విషయం తెలిసిందే. కథ ప్రకారం ఈ సినిమా షూటింగ్ దాదాపు విదేశాల్లోనే జరగనుంది. ఇంతవరకూ ఎవరూ చేయని ప్రదేశాల్లో షూటింగ్ చేయాలనే ఉద్దేశంతో ఈ సినిమా యూనిట్ ముఖ్యులు ఇటలీ వెళ్లి వచ్చిన సంగతి మీకు వివరించాం. వీరు అక్కడి అందమైన, అరుదైన లోకేషన్స్ ని ఫైనలైజ్ చేసుకుని వచ్చారు కూడా.
              ఇటలీలోని పలు ప్రదేశాల్లో ఈ సినిమా షూటింగ్ మే 15 నుంచి మొదలై 50 రోజులపాటు ఏకధాటిగా  జరుగుతుందని అంటున్నారు. బండ్ల గణేష్ ఈ మూవీని భారీగా నిర్మిస్తోన్నారు. 'దూకుడు' సక్సెస్ తో శ్రీను వైట్ల,  'దమ్ము' చిత్రం పై అంచనాలు పెంచేస్తోన్న ఎన్టీఆర్,  'బిజినెస్ మేన్' హిట్ తో జోష్ మీదున్న కాజల్ కాంబినేషన్లో వస్తోన్న ఈ సినిమా పై అంచనాలు భారీ స్థాయిలోనే వున్నాయి. రచయితలు గోపి మోహన్, కోన వెంకట్ కూడా ఈ చిత్రానికి మంచి అవుట్ పుట్ ఇవ్వాలని శ్రమిస్తున్నారు. 
            మరో సంచలన విషయమేమంటే..  'బాద్ షా' చిత్రంలో దివంగత ఎన్. టి. రామారావు నట విన్యాసాన్ని ప్రయోగాత్మకంగా ప్రేక్షకుల ముందుంచేందుకు సన్నాహాలు చేస్తున్నారు. గతంలో రాజమౌళి - ఎన్టీఅర్ కాంబినేషన్లో వచ్చిన 'యమదొంగ' సినిమాలో, దివంగత రామారావుతో కలిసి జూనియర్ ఎన్టీఆర్ చిందులు వేశాడు. ఇప్పుడదే టెక్నిక్ కి మరింత సాంకేతిక నైపుణ్యాన్ని ఉపయోగించి 'బాద్ షా' ఆడియన్స్ ని అలరించేందుకు శ్రీను వైట్ల సిద్ధమౌతున్నాడు. ఈ టెక్నాలజీకి సంబంధించిన ఎపిసోడ్ వరకూ 10 కోట్లు ఖర్చు అవుతుందని వినికిడి. మొత్తంగా ఈ చిత్రంలో తాతామనువడిని కలసి చూసే అవకాశం మరోమారు రాబోతున్నందుకు సంతోషించాల్సిందే.

...avnk