Posted: 04/24/2012 05:42 PM IST

               యంగ్ టైగర్ ఎన్టీఆర్ హీరోగా నటిస్తూ త్వరలో తెరలను తాకబోతోన్న 'దమ్ము' సినిమా దుమ్మురేపుతోంది. వ్యాపార పరంగా ఈ చిత్రం యంగ్ టైగర్ దమ్మెంతో రుజువుచేస్తోంది. విడుదలకు ముందుగానే సుమారు 46 కోట్ల మేర ఈ మూవీ బిజినెస్ చేసేసింది. దీనికి యన్టీఆర్ కథానాయకుడు కావడం ఒక కారణమైతే, బోయపాటి శ్రీను దర్శకుడు కావడం మరో కారణంగా చెబుతున్నారు. అలాగే, మ్యూజిక్ హిట్టవడం, యాక్షన్ ఎపిసోడ్స్ అదిరిపోయాయంటూ ప్రచారం జరగడం బిజినెస్ కు పెద్ద ప్లస్ అయింది. కొన్ని ఏరియాలకు ఈ సినిమా అమ్ముడుపోయిన రేట్లు చూస్తే, గత సినిమాల రికార్డులను దమ్ము అధిగమించిందనే మార్కెట్ వర్గాలు చెబుతున్నాయి.
               కాగా, ప్రతి ఇంట్లోనూ ఇలాంటి కొడుకు వుండాలనిపించే పాత్రను ఎన్టీఆర్ పోషించాడీ చిత్రంలో అని చిత్ర వర్గాలు అంటున్నాయి. ఇప్పటికే మ్యూజిక్ పెద్ద హిట్ అయిందనీ, సినిమా కూడా పెద్ద సక్సెస్ సాధిస్తుందన్న నమ్మకం ఉందనీ కె.యస్. రామారావు ధీమాగా ఉన్నారు.  ఈ చిత్రం ద్వారా కెయస్ కొడుకు వల్లభను నిర్మాతగా పరిచయం చేస్తున్నారు.
              అందరూ బాగుండాలి... అందరూ మనవాళ్లే అనే కాన్సెప్ట్ తో యన్టీఆర్ పాత్ర సాగుతుంది. ప్రేక్షకుల్లో ఈ సినిమా పట్ల ఎటువంటి అంచనాలు వున్నాయో నాకు తెలుసు. వాటికి ఏమాత్రం తగ్గకుండా సినిమా వుంటుంది. ఇప్పటి వరకు యన్టీఆర్ ను ఒక వైపే చూశాం. ఇప్పుడు రెండో వైపు కూడా చూస్తాం. ఆయన నడక, స్టయిల్ కొత్తగా వుంటాయంటోన్న బోయపాటి మాటలు ఈ సినిమా సత్తాను చెప్పకనే చెబుతున్నాయి.
             ప్రస్తుతం పోస్ట్ ప్రొడక్షన్ వర్క్ శరవేగంగా జరుగుతోన్న ఈ మూవీ రేపోమాపో సెన్సార్ కు వెళ్లనుంది.  కీరవాణి సంగీతం అందించిన ఈ  సినిమాలో త్రిష, కార్తీక కథానాయికలుగా నటించిన సంగతి తెలిసిందే. తన దమ్మెంతో చూపి బాక్సాఫీస్ రికార్డుల దుమ్ము దులిపేందుకు  యంగ్ టైగర్ ‘దమ్ము’ ఈ నెల 27 న ప్రేక్షకుల ముందుకు రాబోతోంది.

...avnk