తెలుగు మీడియాలో సైట్లలో గత రెండు రోజులుగా ఈ ఫొటో తెగ ట్రెండ్ అవుతోంది. దాదాపు అన్ని వెబ్ సైట్లు నిషా ఫోటో వేసి.., ఎయిడ్స్ చివరిదశలో హీరోయిన్ అంటూ కథనాలు రాసి ప్రధాన వార్తలుగా పోస్ట్ చేశాయి. ఇలా చేసే ముందు కనీసం ఒక్క నిమిషం కూడా ఈ వార్త ఎంతవరకు కరెక్ట్ అని ఆలోచించలేదు. రేటింగులు.., క్లిక్కుల వేటలో పడి వాస్తవాలు తెలుసుకోకుండా ఇష్టం వచ్చినట్లు వార్తలు అందిస్తున్నారు. అలాగే ఈ వార్తను కూడా అందించి ఘోర తప్పిదం చేశారు. ఎందుకంటే అంతా అనుకుంటున్నట్లు నిషా నూర్ ప్రస్తుతం నాబూర్ దర్గా సమీపంలో లేదు.. ఇంకా చెప్పాలంటే ఈ లోకంలోనే లేదు.

అవును.., వినటానికి షాకింగ్ లా ఉన్నా.. వార్త మాత్రం ముమ్మాటికి నిజం. నిషా చివరిదశ ఫొటోల గురించి తెలుసకున్న తర్వాత ఆరా తీస్తే అసలు విషయాలు వెలుగులోకి వచ్చాయి. ప్రముఖ కంటెంట్ ఫీడింగ్ సైట్ వికిపీడియా.., దాన్లోని అనుబంధ వెబ్ సైట్లను పరిశీలస్తే నిషా నూర్ ఏడేళ్ల క్రితమే చనిపోయినట్లు తెలిసింది. మరిప్పుడీ ఫోటోలేమిటి అంటే.., ఫోటోలు వాస్తవమే. ఒకప్పటి అగ్రతార చనిపోయే సమయంలో ఫోటోలో చూపిన దుస్థితినే అనుభవించింది. ఆ ఫోటోలో సోషల్ మీడియాలో షేర్ అవుతూ రాగా..., ఎవరో చూసి కథనం ప్రచురించారు. దీనికి మరొకరు తమ రచనా శైలిని రుచి చూపించి రాశారు. అలా అంతా ఈ ఫోటోను వేసి.., దయనీయ స్థితిలో నిషా అంటూ ఆర్టికల్స్ వ్రాశారు.

ఇప్పటికైనా ఆలోచించండి. ఒక వార్తను పాఠకులకు ఇస్తున్నాము అంటే.. దాంట్లో ఎంతవరకు ఖచ్చితత్వం ఉంది అనేది తెలుసుకుని ఇవ్వండి. రేటింగులు, ర్యాంకింగ్ ల కోసం మనసుకు అన్పించింది. కంటికి కన్పించింది.., తాము చెప్పిందే వార్త అనుకుంటే ఇలాంటి పొరపాట్లే జరుగుతాయి. ఎంత వేగంగా వార్త ఇస్తున్నాము అనేకంటే.., ఎంత వాస్తవాలు వ్రాస్తున్నాము అనేది ముఖ్యం. పాఠకులు కూడా ప్రతి వార్తను ఈ విషయాన్ని గ్రహించి ఇలాంటి వార్తలను ప్రోత్సహించకుండా ఉంటారని ఆశిస్తున్నాం. అగ్రనటిగా ఎదిగి.. చివరకు దుర్బర జీవితం అనుభవించిన నిషాపై ఇలాంటి కధనం రావటం పట్ల చాలా విచారం వ్యక్తం చేస్తున్నాము. మేము ఫోటో దుస్థితిపై వార్తను రాయకపోయినా.., అందరి పక్షాన ఆమెను క్షమాపణ కోరుతున్నాము.  ఇక నిషా గురించిన అసలు విసయాలు ఇవి.. మీకోసం అందిస్తున్నాము.

* 1980 నుంచి దాదాపు ఆరేళ్ళ పాటు నిషా నూర్ అగ్రనటిగా నిలిచింది.
* తమిళం, మలయాళంలో చాలా హిట్ సినిమాల్లో పెద్ద హీరోల పక్కన నటించింది.
* కళ్యాణ అగత్తిగల్, అయ్యర్ ద గ్రేట్, టిక్ టిక్ టిక్, చువప్పు నాడ వంటి ఉత్తమ సినిమాల్లో నటించింది.
* ఇండస్ర్టీలో అగ్రనటిగా ఉన్న సమయంలోనే ఓ నిర్మాత నిషాను వ్యభిచార కూపంలోకి నెట్టాడు.
* అలా అనుకోకుండా రొంపిలోకి దిగి.., సినిమా ఇండస్ర్టీ నుంచి అదృశ్యమయింది.
* కాలం వేసిన కాటుకు నిషాకు హెచ్.ఐ.వి. వచ్చింది.
* వ్యాధి చివరి దశలో ఎవరూ సాయం చేయక దుర్భర జీవితం అనుభవించింది.
* ముస్లిం మున్నెట్ట కజగం వాలంటీర్లు ఆమెను తంబారం ఆస్పత్రిలో చేర్పించారు.
* మహహ్మారి వ్యాధి ముదరటంతో 2007లో నిషా లోకాన్ని విడిచి వెళ్ళింది.

కార్తిక్

(content source : wikipedia reference sites)