విజయవాడలో పోలీస్ ఆఫీసర్ శ్రీకాంత్

Posted: 02/28/2015 10:53 AM IST

శ్రీకాంత్‌ హీరోగా కరణం బాబ్జీ (శ్రీను ) దర్శకత్వంలో ఓ చిత్రం తెరకెక్కుతుంది. ఈ చిత్ర షూటింగ్ విజయవాడలోని ఇంద్రకీలాద్రీ, బస్టాండ్, జక్కంపూడి కాలనీ పరిసర ప్రాంతాల్లో జరుగుతోంది. అనగాని ఫిలిమ్స్‌ బ్యానర్‌పై ఎ.వి వి దుర్గాప్రసాద్ నిర్మిస్తున్న ఈచిత్రం షూటింగ్ ఇటీవలే ఇంద్రకీలాద్రిపై ప్రారంభమైంది.

శ్రీకాంత్, అక్ష హీరోహీరోయిన్లుగా నటిస్తున్నారు. ఈ సినిమా గురించి హీరో శ్రీకాంత్ మాట్లాడుతూ... ‘చండీ’ సినిమాకు రచయితగా పనిచేసిన బాబ్జీ చెప్పిన కథ నాకు బాగా నచ్చింది. ఈ సినిమా నాకే కాదు, సినిమా టీమ్ మొత్తానికి మంచి బ్రేక్ నిస్తుందనే నమ్మకం ఏర్పడింది అని అన్నారు. ఇందులో తాను పోలీస్ ఆఫీసర్ గా నటిస్తున్నానని, ఈ పాత్ర తనకు ఎంతో నచ్చిందని చెప్పుకొచ్చారు.

దర్శకుడు కరణం బాబ్జీ (శ్రీను) మాట్లాడుతూ... శ్రీకాంత్ గారికి ‘ఖడ్గం’, ‘ఆపరేషన్ దుర్యోదన’ చిత్రాలు ఎంత పేరును తెచ్చిపెట్టాయో… ఈ చిత్రం కూడా అంతకంటే ఎక్కువ పేరును తెచ్చిపెడుతుందనే నమ్మకం ఉందన్నారు. విజయవాడలోనే 90 శాతం షూటింగ్ జరుపుకుంటుందని అన్నారు. త్వరలోనే మరిన్ని వివరాలు తెలియజేయనున్నారు.