‘విశ్వరూపం-2’ని పట్టిపీడుస్తున్న వాయిదాల పర్వం

Posted: 03/14/2015 07:04 PM IST

Kamal hassan vishwaroopam 2 movie release controversy

లోకనాయకుడు కమల్ హాసన్ హీరోగా, తన స్వీయ దర్శకత్వంలో ఎంతో ప్రతిష్టాత్మకంగా తెరకెక్కించిన ‘విశ్వరూపం’ చిత్రం అప్పట్లో సంచలన విజయం సాధించింది. దీంతో కమల్ అప్పుడే ఈ మూవీకి సీక్వెల్ గా ‘విశ్వరూపం-2’ రూపొందిస్తానంటూ ప్రకటించారు. అందుకు అనుగుణంగా ప్రీ ప్రొడక్షన్ పనులు, ఇంకా ఇతరత్ర కార్యక్రమాలను చేశారు. అనుకున్న సమయానికే షూటింగ్ కూడా మొదలుపెట్టారు. కానీ.. మధ్యమధ్యలో కొన్ని అనివార్య కారణాల వల్ల మూవీ షెడ్యూల్స్ మారుతూ వచ్చాయి. పైగా.. ఈ మూవీతోపాటు కమల్ ఇతర సినిమా షూటింగుల్లో బిజీగా వుండటంతో... గతేడాది నుంచి ఈ చిత్రం విడుదల తేదీ వాయిదా పడుతూ వస్తోంది. ఇప్పుడు మరోసారి ఈ మూవీ వాయిదా పడినట్లు తాజా సమాచారం!

విజువల్ వండర్‌గా తెరకెక్కుతున్న ఈ సినిమాను ఏప్రిల్ 13న విడుదల చేయడానికి ఎప్పట్నుంచో సన్నాహాలు చేశారు. అయితే.. పోస్ట్ ప్రొడక్షన్ కార్యక్రమాలు పూర్తి కావడానికి చాలా సమయం పట్టనున్నందున సినిమాను జూన్ నెలకు వాయిదా వేశారు. గత సినిమా కంటే మరింత అద్భుతంగా ఈ సినిమా రావాలని కమల్ పూర్తి శ్రద్ధ పెట్టారు. ఈ చిత్రంలోని ప్రతి సీన్ ప్రేక్షకులకు ఆకర్షించేలా వుండేవిధంగా ఆయన ప్లాన్ చేసుకున్నారట! అందుకే.. దగ్గరుండి అన్ని పనులను కమల్ చేయిస్తున్నారని, ఈ నేపథ్యంలోనే విడుదల తేదీ వాయిదా పడుతూ వస్తోందని యూనిట్ వర్గాలు తెలుపుతున్నాయి. అయితే.. ఈసారి మాత్రం ఖచ్చితంగా ఈ చిత్రం జూన్ నెలలో విడుదల అవుతుందని వాళ్లు చెబుతున్నారు. మరి.. అప్పుడు ఈ మూవీ రిలీజ్ అవుతుందా..? లేదా వాయిదా పడుతుందా..? అన్నది వేచి చూడాల్సిందే!

ఇదిలావుండగా.. మొదట వచ్చిన ‘విశ్వరూపం’ చిత్రం అప్పట్లో విడుదల కాకముందు ఎంత వివాదం సృష్టించిందో తెలిసిందే. ఈ సినిమాలో ముస్లిం మతస్తులవారిని కించపరిచేవిధంగా కొన్ని సీన్లు వున్నాయని, ఈ సినిమాను ఆపివేయాలంటూ కొన్ని రోజుల తరబడి దుమారం కొనసాగింది. అయితే.. చివరికి కమల్ ఈ మూవీని ముస్లిం మతపెద్దలకు చూపించి, అందులో వారికి ఇబ్బంది కలిగించిన సన్నివేశాలు తొలగించడంతో అప్పుడు రిలీజ్ అయింది. మరీ.. ఇప్పుడు రాబోతున్న దీని రెండో భాగం మరెంత వివాదం సృష్టిస్తుందోనని సినీ విశ్లేషకులు అభిప్రాయపడుతున్నారు.