తనయుడి చిత్రంలో ‘మగధీరుడి’ ఝలక్

Posted: 07/25/2015 06:44 PM IST

Chiranjeevi special character ram charan srinu vaitla movie rakul preet singh

మెగాభిమానులకు ఓ శుభవార్త. తమ అభిమాన నటుడు మెగాస్టార్ చిరంజీవిని తిరిగి వెండితెరపై చూద్దామని ఎప్పుడెప్పుడా అని ఎదురుచూస్తున్న ఫ్యాన్స్ కల సాకారం కానుంది. అయితే.. ఇక్కడ మాట్లాడుకుంటోంది ఆయన 150వ చిత్రం గురించి కాదులెండి. రామ్ చరణ్ హీరోగా తెరకెక్కుతున్న సినిమాలో చిరు చేయనున్న ఓ చిన్న క్యారెక్టర్ గురించి. అవును.. చెర్రీ చేస్తున్న తాజా ప్రాజెక్టులో చిరంజీవి కూడా కొద్దిసేపటివరకు ఓ ఆసక్తికరమైన పాత్రలో కనువిందు చేయనున్నాడని సమాచారం.

ప్రస్తుతం రామ్ చరణ్ హీరోగా శ్రీను వైట్ల డైరెక్షన్ లో చేస్తున్న సినిమా ప్రస్తుతం సెట్స్ పై ఉంది. హైదరబాద్ షెడ్యూల్ లో బిజీగా ఉన్న ఈ చిత్ర టీం ఆదివారం నుంచి బ్యాంకాక్ లో ఫ్రెష్ షెడ్యూల్ ని మొదలు పెట్టనుంది. ఇందులో చెర్రీ ఓ స్టంట్ మాస్టర్ గా, ఓ ఫేమస్ తెలుగు హీరోకి డూప్ గా కనువిందు చేయనున్నాడు. తాజాగా ఫిల్మ్ నగర్ వర్గాలు చెబుతున్న సమాచారం ప్రకారం.. మెగాస్టార్ చిరంజీవి ఈ సినిమాలో ఓ స్పెషల్ పాత్రలో కనిపించనున్నాడు. ముందుగా ఈ స్పెషల్ క్యారెక్టర్ కోసం ఓ ప్రముఖ నటుడి తీసుకోవాలని దర్శకుడు శ్రీను వైట్ల భావించాడు. ఆ మేరకు తన అన్వేషణ కొనసాగించాడు. అయితే.. ఈ సమయంలోనే ఈ స్పెషల్ పాత్రకు చిరు పేరును శ్రీనువైట్లకు చెర్రీ చెప్పినట్లు సమాచారం. చెర్రి చెప్పినట్లుగానే శ్రీనువైట్ల ఈ పాత్రలో నటించాల్సిందిగా చిరుని సంప్రదించాడట. ఈ ఐడియాపై చిరు కూడా సముఖతగానే ఉన్నట్లు వార్తలొస్తున్నాయి. ఈ సినిమా బృందం చెబుతున్న వివరాల ప్రకారం.. చిరు–చరణ్ ల మధ్య కొన్ని ఆసక్తికర సన్నివేశాలు ఉంటాయట. ఇక చెర్రీ సరసన రకుల్ ప్రీత్ సింగ్ హీరోయిన్ గా నటిస్తుండగా.. కృతి కర్భంద అతని చెల్లెలిగానూ, నదియా ముఖ్య పాత్రలోనూ నటిస్తున్నారు. ఎస్ఎస్ తమన్ మ్యూజిక్ అందిస్తున్న ఈ మూవీకి డివివి దానయ్య నిర్మాత.

ఇదిలావుండగా.. రామ్ చరణ్ నటించిన ‘మగధీర’ సినిమాలోని ఓ పాటలో చిరంజీవి కొద్దిసేపు తెరపై కనిపించి తెలుగు ప్రేక్షకులను మెప్పించారు. ఆ తర్వాత మళ్లీ ఆయన తెరపై కనిపించలేదు. అయితే.. ఇప్పుడు మళ్ళీ రామ్ చరణ్ సినిమాతోనే ఆయన వెండితెరపై రీఎంట్రీ ఇవ్వడం విశేషం. చిరు 150వ చిత్రం ఇంకా ఆలస్యం అవుతున్న సందర్భంలో ఆయనతో ఈ తన చిత్రంలో కీలక రోల్ లో నటింపజేస్తే బాగుంటుందని చెర్రీ భావించాడు. పైగా.. ఈ పాత్ర సినిమాలో చాలా ప్రత్యేకం కావడంతో చిరు కూడా గ్రీన్ సిగ్నల్ ఇచ్చినట్లు సమాచారం. మరోవైపు చరణ్ చిరు నటించనున్న 150వ సినిమా స్క్రిప్ట్ పనులను కూడా పూర్తి చేయిస్తున్నాడు. ఆ సినిమా కూడా ఇదే ఏడాది సెట్స్ పైకి వెళ్లనుంది.