ఒక్క సినిమాకు ఊరూరా నిర్మాతలు

Posted: 02/26/2016 04:26 PM IST

‘ఈగ’, ‘అందాల రాక్షసి’, ‘లెజెండ్’, ‘ఊహలు గుసగుసలాడే’, ‘దిక్కులు చూడకు రామయ్య’ వంటి వరుస బ్లాక్ బస్టర్ హిట్ చిత్రాలను నిర్మించిన నిర్మాణ సంస్థ ‘వారాహి చలన చిత్రం’. ఈ బ్యానర్ పై తెలుగులో మంచి చిత్రాలను అందిస్తున్న నిర్మాత సాయి కొర్రపాటి తాజాగా డిస్ట్రిబ్యూటర్లకు ఓ బంపర్ ఆఫర్ ప్రకటించాడు.

‘నేను ప్రొడ్యూసర్’ అనే కొత్త కాన్సెప్టుతో ముందుకొచ్చాడు సాయికొర్రపాటి. ఈ కాన్సెప్ట్ ప్రకారం ఒకే సినిమాకు ఊరురా నిర్మాతలు మారిపోతూ వుంటారట. అంటే సినిమాను తమ సొంత ప్రాంతంలో విడుదల చేసేందుకు ఎవ్వరైనా ముందుకు రావొచ్చు. అలా వచ్చిన వారి పేరునే ఆ ప్రాంతానికి ప్రొడ్యూసర్‌గా ప్రచారం కల్పిస్తారు.

సాయి కొర్రపాటి ఏర్పాటుచేసిన nenuproducer.com అనే వెబ్ సైట్లోకి వెళ్లి, ఎవరైనా తమ ప్రాంతంలో సినిమాను విడుదల చేసేందుకు బిడ్ దాఖలు చేసుకోవచ్చు. ఎవరైతే డిస్ట్రిబ్యూషన్ హక్కులను సొంతం చేసుకుంటారో వాళ్ళను అక్కడి నిర్మాతగా ప్రకటిస్తారు. ఈ ఆలోచనను ‘గుంటూర్ టాకీస్’ సినిమాతో శ్రీకారం చుట్టారు సాయి కొర్రపాటి. మరి ఈ సినిమాకు ఎంత మంది నిర్మాతలుగా మారనున్నారో చూడాలి.