భాగమతి అలాంటిది కాదట

Posted: 05/12/2016 01:59 PM IST

‘అరుంధతి’, ‘బాహుబలి’, ‘రుద్రమదేవి’, ‘సైజ్ జీరో’ వంటి వరుస చిత్రాల తర్వాత సౌత్ ఇండియన్ స్టార్ హీరోయిన్ అనుష్క మరోసారి ‘భాగమతి’తో ప్రేక్షకులను అలరించడానికి సిద్ధమవుతోంది. అయితే ఈ టైటిల్ ప్రకటించిన క్షణం నుంచి ఇదేదో చారిత్రాత్మక కథతో రూపొందబోతున్నట్లుగా రకరకాల కథనాలు వినిపించాయి.

కానీ ఇది చారిత్రక కథతో రూపొందడం లేదని దర్శకుడు అశోక్ ఓ క్లారిటీ ఇచ్చేసారు. ఈ సినిమా గురించి అశోక్ తెలియజేస్తూ... అనుష్క ప్రధాన పాత్రలో తాను తెరకెక్కించబోయే సినిమా చారిత్రక కథతో కాదని, ఇది థ్రిల్లర్ కాన్సెప్ట్ తో తెరకెక్కబోయే కమర్షియల్ ఎంటర్ టైనర్ అని చెప్పుకొచ్చాడు.

ప్రస్తుతం ప్రీ ప్రొడక్షన్ కార్యక్రమాలు జరుగుతున్నాయి. త్వరలోనే ఈ ప్రాజెక్ట్ సెట్స్ పైకి వెళ్లనుంది. మరి అనుష్క ‘భాగమతి’గా ఎలాంటి లుక్ లో కనిపించనుందో చూడాలి. ‘బాహుబలి- కంక్లూజన్’ చిత్ర షూటింగ్ లో అనుష్క బిజీగా వుంది. ఈ సినిమా వచ్చే ఏడాది జులై లో ప్రపంచ వ్యాప్తంగా విడుదల కానుంది.