సుకుమార్, రాంచరణ్ లకు అగ్రదర్శకుడి ప్రశంసలు

Posted: 10/08/2018 07:55 PM IST

మెగా పవర్ స్టార్ రాంచరణ్ తేజ్ నటించిన రంగస్థలం తెలుగు చిత్ర పరిశ్రమలో అనేక రికార్డులను నెలకొల్పి ముందుకు దూసుకెళ్లిందన్న విషయం అందరీకీ తెలిసిందే. ఏకంగా రెండు వందల కోట్లకు పైగా ఆదాయాన్ని రాబట్టిన చిత్రంగానూ ఈ సినిమా నిలిచింది. అంతేకాదు ఏకంగా వందరోజుల పండుగను కూడా చేసుకున్న ఈ సినిమాపై తాజాగా అగ్రదర్శకుడు కే. రాఘవేంద్రరావు ప్రశంసలు కురిపించారు.  ఓ కార్యక్రమంలో ఆయన తన మనస్సులోని బావాలను పంచుకున్నారు. ఇంతకీ ఆయన ఏమన్నారంటే..

తాజాగా 'చెప్పాలని వుంది' కార్యక్రమంలో ఆయన తన కెరియర్ కి సంబంధించిన ముచ్చట్లను పంచుకున్నారు. ఇదే సమయంలో ఆయనకు ఓ ప్రశ్న ఎదురైంది. "తమిళ .. బెంగాలీ .. హిందీ భాషా చిత్రాల్లో జరుగుతోన్న ప్రయోగాలు తెలుగులో జరగడం లేదు. తెలుగు దర్శకులు ప్రయోగాలు చేయడానికి ముందుకు రావడం లేదనే విమర్శ కూడా వుంది .. ఈ విషయంపై మీరు ఏమంటారు?" అనే ప్రశ్న రాఘవేంద్రరావుకు ఎదురైంది.

అప్పుడు ఆయన స్పందిస్తూ .. "కొంతకాలం క్రితం వరకూ ఈ విమర్శ నిజమేనని అనుకోవచ్చు. కానీ ఇప్పుడొస్తోన్న యువ దర్శకులు చాలామంది కొత్తగా ఆలోచిస్తున్నారు .. డిఫరెంట్ టైప్ ఆఫ్ మూవీస్ చేస్తూ వెళుతున్నారు. చరణ్ లాంటి హీరోను చెవిటివాడిగా చూపించాలంటే మేమంతా భయపడేవాళ్లం. కానీ సుకుమార్ అద్భుతంగా ఆ పాయింట్ ను హ్యాండిల్ చేశాడు. ఇక ఇమేజ్ ను పక్కన పెట్టేసి హీరోలు ముందుకురావడం కూడా మంచి పరిణామం" అని చెప్పుకొచ్చారు.