Posted: 06/29/2012 06:34 PM IST

సంగీత దర్శకుడు దేవిశ్రీప్రసాద్ కీ మెగా క్యాంప్ కి మంచి రిలేషన్స్ ఉన్న సంగతి తెలిసిందే. తాజాగా రామ్ చరణ్ బాలీవుడ్ ఎంట్రీ ఇస్తూ ‘జంజీర్'రీమేక్ చేస్తున్న సందర్బంగా దేవిని తన చిత్రానికి రికమెండ్ చేసారని సమాచారం. వెంటనే దర్సక, నిర్మాతలు ఓకే చేసి దేవినే తమ చిత్రానికి సంగీతం అందించాలని సంప్రదించారని బాలీవుడ్ మీడియా అంటోంది. అందులోనూ తన ఐటం సాంగ్స్ తో ఇప్పటికే బాలీవుడ్ లో దేవి పాపులర్ అయ్యారు. ‘ఐటమ్ పాటలకే కింగ్‌లాంటిది’ అని తెలుగు ప్రేక్షకులు కితాబులు ఇచ్చిన ఐటమ్ పాటల్లో ‘అ అంటే అమలాపురం..’ ఒకటి. ఆ తర్వాత అలాంటి పేరు తెచ్చుకున్నవాటిలో ‘రింగ... రింగ...’ చేరింది. ఈ రెండు పాటల సృష్టికర్త దేవిశ్రీప్రసాద్ అని ప్రత్యేకంగా చెప్పక్కర్లేదు. ఈ పాటలే దేవిని బాలీవుడ్‌లో బాగా పాపులర్ చేశాయి. ‘రింగ రింగ..’ పాట సల్మాన్‌ఖాన్ నటించిన ‘రెడీ’లో ‘దింక చిక..’ పేరిట హిందీలో వినిపించింది.

ఈ ట్యూన్ సల్మాన్‌కి పిచ్చి పిచ్చిగా నచ్చేసింది. బాలీవుడ్‌వారిని కూడా ఈ బాణీ బాగా ఆకట్టుకుంది. ఇక సోనూసూద్ నటిస్తున్న హిందీ చిత్రం ‘మాగ్జిమమ్’లో ‘అ అంటే అమలాపురం..’ పాటను ఉపయోగించారు. తెలుగులో హిట్ అయిన ఈ రెండు ప్రత్యేక పాటలు ఉత్తరాదివారిని కూడా ఉర్రూతలూగిస్తున్నాయి.  ఫలితంగా దేవీకి బాలీవుడ్ నుంచి భారీ ఆఫర్లే వస్తున్నాయి. వాటిలో ‘జంజీర్’ ఒకటి. రామ్‌చరణ్ హీరోగా అమితాబ్‌బచ్చన్ నటించిన ‘జంజీర్’కి రీమేక్‌గా రూపొందుతున్న చిత్రం ఇది. ఈ చిత్రానికి దేవిశ్రీప్రసాద్‌ని పాటలివ్వమని దర్శక, నిర్మాతలు అపూర్వలఖియా, అమిత్‌మెహ్రా కోరారట. దేవి కూడా ఈ చిత్రానికి పచ్చజెండా ఊపారని సమాచారం.