Posted: 06/29/2012 07:03 PM IST

బాలీవుడ్ బిగ్ బి ఒక నెంబరు గురించి చెబుతున్నారు. ఆయన 786వ ట్వీట్‌ని పొందుపరిచారు.   786... నా ప్రాణాలను రెండు సార్లు కాపాడిన నంబర్ ఇదిఅన్నారు అమితాబ్‌బచ్చన్. ఈ సంఖ్య గురించి ఆయన మాట్లాడానికి కారణం ఉంది. ప్రేక్షకులకు, అభిమానులకు దగ్గరగా ఉండటానికి ఇష్టపడే బిగ్ బి అందుకు ట్విట్టర్‌ని సెలక్ట్ చేసుకున్నారు. తన మనోభావాలను దాదాపు ప్రతిరోజూ ట్విట్టర్‌లో పొందుపరుస్తుంటారాయన.  ఓసారి ఫ్లాష్‌బ్యాక్‌లోకి వెళ్లారు అమితాబ్. ‘దీవార్, కూలీ’ చిత్రాల్లో 786 నంబర్ గల బ్యాడ్జ్ తన ప్రాణాలను కాపాడిందన్నారు అమితాబ్. ‘దీవార్’లో శత్రువు ఆయన్ను టార్గెట్ చేసి తుపాకీ పేల్చినప్పుడు, ఆ గుండు అమితాబ్ కోట్ ప్యాకెట్‌లో ఉన్న 786 బ్యాడ్జికి తగులుతుంది. ఆ రకంగా అమితాబ్ సేఫ్ అయ్యారు. అయితే క్లయిమాక్స్‌లో ఈ బిళ్ల పడిపోవడంతో తన పాత్ర చనిపోతుందని బిగ్ బి చెప్పారు. అలాగే ‘కూలీ’ క్లయిమాక్స్‌లో తన శరీరంపై ‘చాద్దర్’ కప్పబడి ఉంటుందని, శత్రువు తనని షూట్ చేసినా, ఎలాంటి అపాయం జరగదని అమితాబ్ పేర్కొన్నారు.

ఆ రకంగా ‘786’ నంబర్ తన పాత్ర ప్రాణాలను కాపాడిందని ఆయన చెప్పారు. ఈ నంబర్ గురించి మరింత వివరంగా అమితాబ్ చెబుతూ -‘‘ముస్లిమ్ సోదర, సోదరీమణులు ఏదైనా రాసేముందు ముందు 786 అని రాయడాన్ని శుభప్రదంగా భావిస్తారు. అల్లా దయవల్ల ఈ నంబర్‌కి నా జీవితంలో కూడా ఎంతో ప్రాధాన్యం ఉంది. ‘దీవార్’ విడుదలైన తర్వాత చాలామంది తమ కారుకి 786 నంబర్ తీసుకున్నారు. అలాగే ఎంతోమంది గొలుసులకు లాకెట్ అయ్యింది’’ అన్నారు.