తెలుగు ప్రేక్షకుల నాడీనిధానం

Posted: 01/11/2014 10:46 AM IST

నాడి పట్టుకోవటం తెలిస్తే సగం వైద్యం చేసేసినట్లేననేవారు పూర్వకాలం ఆయుర్వేద వైద్యులు. 

అయితే తెలుగు ప్రేక్షకుల నాడిని పట్టుకోవటం పెద్ద పెద్ద కొమ్ములు తిరిగిన దర్శకులకు కూడా వశం కావటం లేదు.  దొరికినట్లే దొరికి పట్టుజారిపోతోంది.  దానితో ప్రతి చిత్రమూ ఒక పరీక్షే అవుతోంది.  అంత ఆలోచించి, కష్టపడి నిర్మించిన తర్వాత కూడా ప్రేక్షకులు ఆదరించకపోవటం జరుగుతోంది.  ప్రచారానికి ఎంత ఖర్చు పెట్టినా అది వృధా ప్రయాసగానే మారుతోంది.  ప్రచారం వలన వస్తే మొదటి రోజు ఆదాయం వస్తుందేమో అంతే.  ఆ తర్వాత సినిమా గురించిన ప్రేక్షకుల అభిప్రాయాలు చకచకా వ్యాపిస్తున్నాయి.  దానితో సినిమా పడిపోవటమో, పైకి లేవటమో లేదా సగటు ఆటగా నిలిచిపోవటమో జరుగుతోంది. 

మహేష్ బాబు నటించిన తాజా చిత్రం 1 మీద వ్యతిరేక వ్యాఖ్యలు రావటంతో కొత్తదనాన్ని తెలుగు వాళ్ళు కోరుకోవటం లేదా అంటే అదీ సరికాదు.  అయితే ఇక్కడ జరుగుతున్నదేమిటంటే, తెలుగు ప్రేక్షకులు తక్కువ బడ్జెట్ సినిమాలు చిన్న నటీనటులతో తయారయ్యే సినిమాలో కోరుకునేదాన్ని, లేదా ఇతర భాషా చిత్రాలలో కోరుకునేదాన్ని తెలుగు సినిమాల్లో అగ్ర నాయకులతో కోరుకోవటం లేదు. 

సూపర్ స్టార్ రజనీకాంత్ కి ఉన్న క్రేజ్ మిగిలిన స్టార్స్ ఎవరికీ లేదు మన దేశంలో.  అయినా ఆయన సినిమా బాబా ని ఆదరించలేదు.  కథ కొత్తదే కానీ స్టార్ ఇమేజ్ ఉన్న వాళ్ళ చిత్రంలో ప్రేక్షకులు కోరుకునేది వేరు.  పవన్ కళ్యాణ్ అత్తారింటికి దారేది లో పవన్ అభిమానులకు కావలసిన అన్ని అంశాలూ ఉండటమే దాని విజయానికి కారణం.  అవేమీ లేకపోవటమే కొమరం పులి సినిమా ఫెయిలవటానికి కారణం. 

ఇప్పుడు అందరి దృష్టీ రామ్ చరణ్ ఎవడు మీద ఉంది.  అదీ బుడుంగుమని మునిగితే సంక్రాంతి శలవులను వృధా చేసుకున్నట్లే!  అంతే కాదు చిన్న సినిమాలు ప్రదర్శనకు నోచుకోకుండా థియేటర్లను అనవసరంగా ఆక్రమించుకున్నవాళ్ళూ అవుతారు.

-శ్రీజ