దాసరి - పవన్ ల మధ్య చేరిన ‘గోపాలుడు’!

Posted: 03/06/2015 12:13 PM IST

దర్శకరత్న దాసరి నారాయణరావు, పవర్ స్టార్ పవన్ కల్యాణ్ కాంబినేషన్ లో ఓ మూవీ తెరకెక్కనున్నట్లు ఇటీవలే వార్తలు వెలువడిన విషయం తెలిసిందే! ఈ వార్త వెలువడినప్పటికీ నుంచి దీనిపై ఇంకా రకరకాల రూమర్లు వినిపిస్తున్నాయి. నిజానికి ఈ చిత్రంపై పవన్ కల్యాణ్ ఇంతవరకు స్పందించలేదు కానీ.. దాసరి మాత్రం తాను పవన్ తో కలిసి మూవీ తీస్తున్నట్లుగా సోషల్ మీడియాలో ప్రకటించారు.

అంతేకాదు.. ఈ మూవీ ప్రీ ప్రొడక్షన్ పనుల్లో ఆయన నిమగ్నమయ్యారని వార్తలొస్తున్నాయి. పైగా.. గతంలో నిలిచిపోయిన పవన్ డ్రీమ్ ప్రాజెక్ట్ ‘సత్యాగ్రహి’ మూవీని దాసరి తెరకెక్కించనున్నారని, దీనికి పవనే దర్శకత్వం వహించనున్నారని ప్రచారాలు జరుగుతున్నాయి. ఆ విషయాలు ఎలాగున్నా.. తాజాగా ఈ మూవీకి సంబంధించి మరో వార్త ఇండస్ట్రీలో చక్కర్లు కొడుతోంది.

దాసరి-పవన్ ల చిత్రానికి ‘గోపాల గోపాల’ ఫేం డాలీ దర్శకత్వం వహించే అవకాశాలు వున్నాయన్న రూమర్ ఇప్పుడు ఇండస్ట్రీలో జోరుగా వినిపిస్తోంది. ‘గోపాల గోపాల’ మూవీ నేపథ్యంలోనే డాలీతో కలిసి మరో మూవీని చేస్తానని పవన్ ప్రకటించిన విషయం విదితమే! అప్పట్లోనే ఆయన డాలీకి ఒక మంచి కథను రెడీ చేయమని చెప్పినట్లు వార్తలొచ్చాయి.

ఇప్పుడు డాలీ అదే పనిలో వున్నాడని చెబుతున్నారు. ఆయన కథ ఓకే అయితే.. ఈ సినిమాకు అతనే దర్శకుడు అవుతాడని చెప్పుకుంటున్నారు. మరి.. ఈ వార్తలు నిజమో..? కాదో..? తెలియాలంటే మరికొన్ని రోజులవరకు ఆగాల్సిందే! రానున్న రోజుల్లో ఈ మూవీకి సంబంధించి ఇంకా ఎన్ని వార్తలొస్తాయో!