తమిళ నిర్మాతలకు ‘లేట్’ రుచి చూపిస్తున్న కాజల్

Posted: 03/24/2015 04:06 PM IST

తెలుగు చిత్రపరిశ్రమలో స్టార్ హీరోయిన్ గా కొనసాగిన కాజల్ అగర్వాల్ కి ఇప్పుడు ఇక్కడ ఆఫర్లు లేకపోవడంతో అమ్మడు తమిళ ఇండస్ట్రీకి తన మకాం మార్చేసింది. ప్రస్తుతం ఈ అమ్మడు తమిళంలో రెండు సినిమా షూటింగుల్లో బిజీగా వుంది. మొదట అంతా సవ్యంగానే కొనసాగింది కానీ.. వున్నట్లుండి కాజల్ మీద తమిళ నిర్మాతలు తీవ్ర ఆగ్రహం వ్యక్తం చేస్తున్నారట! ఎందుకంటే.. గతంలో ఎన్నడూలేని విధంగా ఈసారి ఈ అమ్మడు షూటింగులకు చాలా ఆలస్యంగా వస్తోందట! అయితే.. ఈ అమ్మడు ఇలా కావాలనే చేయడం లేదులెండి.. దీని వెనుక ఒక రహస్యం వుంది.

అదేమిటంటే.. కాజల్ ఇటు తమిళ సినిమాలతోపాటు అటు హిందీలోనూ ఓ రొమాంటిక్ మూవీలో నటిస్తోంది. అన్ని చిత్రాలు ఒకేసారి షూటింగ్ జరుగుతున్నాయి కాబట్టి.. ఈ అమ్మడు ముంబయ్-చెన్నయ్ నగరాల మధ్య విమానాల్లో చక్కర్లు కొడుతోంది. రాత్రివేళ ముంబయ్ లో హిందీ సినిమా షూటింగులో పాల్గొని.. తిరిగి పొద్దున్నే విమానమెక్కి చెన్నయ్ కి చేరుకుంటోంది. అయితే.. కాస్త విశ్రాంతి తీసుకుని, రెడి అయ్యి, సెట్స్ కి వెళ్లేసరికి మధ్యాహ్నం అయిపోతోందట! ఎంత త్వరగా రావడానికి ప్రయత్నించినప్పటికీ.. అమ్మడు సమయానికి షూటింగ్ స్పాట్ కి చేరుకోలేకపోతోందట! దీంతో ఓ పూట షూటింగ్ క్యాన్సిల్ చేసుకుని, మధ్యాహ్నమే చిత్రీకరణ జరుపుకోవాల్సి వస్తోంది.

తమిళనాట షూటింగ్ ముగిసిన అనంతరం కాజల్ మళ్లీ సాయంకాలం విమానమెక్కి ముంబయ్ కి చెక్కేస్తోందట! దాంతో తమకు తక్కువ సమయం కేటాయించి, హిందీ సినిమాకే ఎక్కువ ప్రియారిటీ ఇస్తోందని తమిళ నిర్మాతలు ఆమెపై మండిపడుతున్నారని కోలీవుడ్ లో చెప్పుకుంటున్నారు. ఇలాగే కొన్నాళ్లపాటు కొనసాగితే.. తమిళనాటలోనూ ఈమెకు ఆఫర్లు తగ్గిపోతాయని అంటున్నారు. మరి.. ఇటువంటి సిట్యువేషన్ లో కాజల్ ఏం చేస్తుందో వేచి చూడాల్సిందే!