మహేష్ సినిమాకు 80కోట్ల బడ్జెట్?

Posted: 10/09/2015 03:58 PM IST

Murugadoss mahesh babu movie budget details

మహేష్ బాబు హీరోగా ప్రముఖ తమిళ దర్శకుడు ఏఆర్ మురుగదాస్ దర్శకత్వంలో ఓ చిత్రం తెరకెక్కనున్న విషయం తెలిసిందే. ‘గజిని’, ‘తుపాకీ’, ‘కత్తి’ వంటి భారీ బ్లాక్ బస్టర్ హిట్ చిత్రాల దర్శకుడు మురుగదాస్ ఇటీవలే చెప్పిన స్టోరీలైన్ మహేష్ కు బాగా నచ్చడంతో వెంటనే గ్రీన్ సిగ్నల్ ఇచ్చేసాడని, దాదాపు ఈ ప్రాజెక్టు ఖరారు అయినట్లుగా తెలిసింది.

అయితే ఈ చిత్రాన్ని తెలుగు, తమిళం భాషలలో ఏకకాలంలో రూపొందనున్న ఈ ప్రాజెక్టును ప్రముఖ నిర్మాతలు ఆర్.బి.చౌదరి, ఎన్వీ ప్రసాద్ లు సంయుక్తంగా నిర్మించనున్నారని తెలిసింది. దాదాపు 80 కోట్ల భారీ బడ్జెట్ తో నిర్మించబోతున్నట్లుగా వార్తలొస్తున్నాయి. ఈ మధ్య వస్తున్న స్టార్ హీరోల సినిమాల రెమ్యునరేషన్లు మరియు సినిమా బడ్జెట్ లు ఆకాశాన్నంటే రేంజుకు పెరిగిపోయాయి.

ఇటీవలే మహేష్ నటించిన ‘శ్రీమంతుడు’ చిత్రం కూడా భారీ విజయం సాధించడంతో మహేష్ సినిమాలకు మళ్లీ క్రేజ్ ఏర్పడింది. పైగా రాజమౌళి దర్శకత్వంలో మహేష్ హీరోగా ఓ సినిమా రూపొందనుందనే వార్తలు రావడంతో మహేష్ కు మార్కెట్ మరింతగా పెరిగిపోయింది. అయితే మురుగదాస్ తో మహేష్ చేయబోయే సినిమా విషయంలో మరికొద్దిరోజుల్లోనే ఓ క్లారిటీ రానుంది. ఈ విషయంపై చిత్ర యూనిట్ త్వరలోనే అధికారికంగా ప్రకటించనున్నారు.

ప్రస్తుతం శ్రీకాంత్ అడ్డాల దర్శకత్వంలో మహేష్ హీరోగా ‘బ్రహ్మోత్సవం’ చిత్రం తెరకెక్కుతోంది. భారీ బడ్జెట్ చిత్రాల నిర్మాణ సంస్థ పివిపి బ్యానర్ పై ప్రసాద్.వి.పోట్లూరి నిర్మిస్తున్నారు. భారీ అంచనాలతో రూపొందుతున్న ఈ సినిమాను వచ్చే ఏడాది సంక్రాంతి కానుకగా విడుదల చేయడానికి చిత్ర యూనిట్ సన్నాహాలు చేస్తున్నారు.