కమల్ సినిమాలో శృతి-గౌతమి చిచ్చు?

Posted: 08/13/2016 11:05 AM IST

కమల్ హాసన్ సహచరి గౌతమికి, ఆయన కూతురు శృతీహాసన్ కు అస్సలు పడట్లేదనే వార్త ఇప్పుడు సౌత్ లో చక్కర్లు కొడుతోంది. శభాష్ నాయుడు షూటింగ్ సమయంలో వీరి గొడవ ముదరి పాకాన పడినట్లు చిత్రయూనిట్ లీకులు ఇస్తోంది. కమల్ హసన్, రమ్యకృష్ణ హీరోహీరోయిన్లుగా శభాష్ నాయుడు రూపుదిద్దుకుంటుండగా, శృతీహాసన్ అందులో ఓ కీలక పాత్ర పోషిస్తున్న సంగతి తెలిసిందే. ప్రస్తుతం యూఎస్ లో షూటింగ్ జరుగుతోంది.

అయితే ఏ సినిమా షూటింగులోనైనా సరే కూల్ గా కనిపించే శ్రుతి  తన తండ్రి రూపొందిస్తున్న ఈ చిత్రం సెట్స్ లో మాత్రం చాలా మూడీగా ఉంటోందట. పైపెచ్చు, తండ్రి కమల్ సహచరి గౌతమి పట్ల కోపంగా కూడా ఉంటోందని వార్తలొస్తున్నాయి. ఈ చిత్రానికి సంబంధించిన కాస్ట్యూమ్స్ డిజైనింగ్ బాధ్యతలను గౌతమీయే చూస్కోంటోంది. అక్కడే వీరి మధ్య గొడవలొస్తున్నాయని సమాచారం.

గౌతమీ పెత్తనాన్ని సహించలేని శృతీ కాస్ట్యూమ్స్ వంకతో రోజు గొడవలు చేస్తోందట. 'నా స్టయిల్ కి తగ్గట్టుగా ఇవి లేవు' అంటూ ఆమె చిర్రుబుర్రులాడుతోందని యూనిట్ వర్గాల ద్వారా తెలుస్తోంది. ఈ గొడవలతో అప్సెట్ అవుతున్న కమల్ వీరిద్దరి మధ్య రాజీ కుదర్చడానికి ప్రయత్నిస్తున్నప్పటికీ శృతీ అస్సలు తగ్గట్లేదంట. మరి ఈ సమస్యను కమల్ ఎలా పరిష్కరిస్తాడో చూడాలి.