ధ్రువలో అంత స్కోప్ ఎక్కడిది?

Posted: 08/20/2016 10:44 AM IST

రీమేక్ ధ్రువతోనైనా కసి తీరా హిట్ కొట్టాలని చూస్తున్నాడు మెగా పవర్ స్టార్ రాంచరణ్. ఒరిజినల్ వర్షన్ లో విలన్ పాత్రే హైలెట్ అయినప్పటికీ, తెలుగులో మాత్రం దర్శకుడు సురేందర్ రెడ్డి హీరో పాత్రనే హైలెట్ చేయించేలా స్క్రిప్ట్ మార్పించేశాడు. ఇక ఇప్పుడు సినిమాకు మరో అదనపు ఆకర్షణ తెచ్చేలా ఫ్లాన్ చేస్తున్నాడని తెలుస్తోంది.

ఈ సినిమాలో స్టైలిష్ స్టార్ అల్లు అర్జున్ ఓ స్పెషల్ పాత్రలో మెరవనున్నాడనే వార్త ఫిల్మ్ నగర్ లో చక్కర్లు కొడుతుంది. ఈ బావబామర్దుల రిలేషన్ ఎంత స్ట్రాంగో తెలిసిందే. చెర్రీ కెరీర్ కోసం బన్నీ త్యాగం చేసిన సందర్భాలు అనేకం ఉన్నాయి. అంతేకాదు ఎవడు చిత్రంలో కూడా ఆ రోల్ చెర్రీ కోసమే చేశాడని ప్రత్యేకంగా చెప్పాల్సిన అవసరం లేదు. దీంతో ధ్రువలో ప్రత్యేక పాత్రలో మెరిసేందుకు అర్జున్ ఎలాంటి అభ్యంతరం చెప్పడనే అనుకోవచ్చు. అయితే ఈ చిత్రంలో బన్నీ క్యారెక్టర్ ఏంటా అన్నది తెలియటం లేదు.

తనిఒరువన్ లో స్పెషల్ అప్పీరియన్స్ లాంటి హడావుడులు ఏం లేవు. సో... బన్నీ క్యారెక్టర్ ఉందా లేదా అన్నది నిర్ధారణ కాకముందే, రోల్ ఏమయి ఉంటుందా అన్న డిస్కషన్ అప్పుడే మొదలైపోయింది. రకుల్ హీరోయిన్ గా గీతా ఆర్ట్స్ బ్యానర్ లో తెరకెక్కుతున్న ఈ చిత్రానికి హిప్ హాప్ తమిజా స్వరాలు సమకూరుస్తున్నాడు. దసరా కానుకగా అక్టోబర్ 7 న సినిమా రిలీజ్ అయ్యే అవకాశం ఉంది.