Posted: 10/17/2012 04:10 PM IST

భారత బ్యాటింగ్‌ దిగ్గజం సచిన్‌ టెండూల్కర్‌కు అరుదైన పురస్కారం దక్కింది. ఆస్ట్రేలియా పౌర పురస్కారం 'ఆర్డర్‌ ఆఫ్‌ ఆస్ట్రేలియా 'కు పరుగుల రారాజు సచిన్‌ ఎంపికయ్యాడు. ఈ విషయాన్ని ఆసీస్‌ ప్రధాని జూలియా గిలార్డ్‌ మంగళవారం ఒక ప్రకటనలో తెలిపింది. 'ఆస్ట్రేలియా, భారత్‌ల మధ్య ఈ క్రికెటర్‌ గొప్ప బంధంగా నిలిచాడు. రెండు దేశాలు క్రికెట్‌తో ముడిపడినవి. సచిన్‌కు ఆర్డర్‌ ఆఫ్‌ ఆస్ట్రేలియా సభ్యత్వాన్ని దృవీకరిస్తున్నందుకు చాలా సంతోషంగా ఉంది.' అని గిలార్డ్‌ పేర్కొంది. ఆస్ట్రేలియేతరులు ఆర్డర్‌ ఆఫ్‌ ఆస్ట్రేలియా మెంబర్‌గా ఎంపికకావడం అరుదైన విషయమని ఆమె తెలిపింది. మాస్టర్‌ ప్రత్యేకమైన క్రికెటర్‌ అని ఆమె ప్రశంసించింది. సచిన్‌ 190 టెస్టుల్లో 15,533 పరుగులు, 463 వన్డేల్లో 18,426 పరుగులు చేశాడు. ఈ అవార్డుకు ఎంపికైన రెండో భారతీయుడు సచిన్‌ కావడం విశేషం. కాగా, భారత్‌ నుంచి 2006లో అటార్నీ జనరల్‌ సోలీ సోరాబ్జీకి ఈ గౌరవం దక్కింది. ఆస్ట్రేలియా-భారత్‌ దైపాక్షిక న్యాయ సంబందాలు మెరుగు పర్చినందుకు ఆయన ఈ అవార్డుకు ఎంపికయ్యాడు. 2009లో వెస్టిండీస్‌ క్రికెటర్‌ బ్రియన్‌ లారాకు ఈ గౌరవం దక్కింది. మరో విండీస్‌ క్రికెట్‌ దిగ్గజం క్లైవ్‌ లాయిడ్‌ 1985లో ఈ అవార్డుకు ఎంపికయ్యాడు. ఆస్ట్రేలియా రాణి ఎలిజబెత్‌-2 1975లో 'ఆర్డర్‌ ఆఫ్‌ ఆస్ట్రేలియా'ను ఏర్పాటు చేసింది. దేశానికి అత్యున్నత సేవలు అందించిన ఆస్ట్రేలియావాసులను ఈ అవార్డుతో సత్కరిస్తారు.

...avnk