Posted: 12/17/2012 10:16 AM IST

మన దేశంలో క్రికెట్ కి ఉన్నంత క్రేజ్ మరే ఇతర ఆటకి ఉండదనడంలో సందేహం లేదు. ఒకప్పుడు ఒలంపిక్స్ లో పథకాల మీద పథకాలు సాధించిన మన హాకీ ఇండియా ఆటగాళ్ళకు ఇప్పుడు అంతంత మాత్రమే అధరణ ఉంది. వారి వచ్చే రెమ్యునరేషన్స్ కూడా తక్కువే. కానీ ఇప్పుడు వారి కష్టాలు తీరి పోయినట్లే కనిపిస్తున్నాయి. ఇప్పుడిప్పుడే క్రికెట్ లో ఐపీఎల్ నిర్వహించినట్లుగా హాకీ ఇండికా లీగ్ పేరుతో నిర్వహించబోతున్న టోర్నీలో భారత ఆటగాళ్ళ పంట పండింది. వివిధ ఫ్రాంఛైజీలు ఆటగాళ్ళను కొనడానికి పోటీ పడ్డాయి. భారత హాకీ జట్టు కెప్టెన్ సర్దార్ సింగ్‌ కి అత్యథిక ధర  లభించగా, రెండోస్థానం డ్రాగ్ ఫ్లిక్కర్ రఘునాథ్ సొంతం చేసుకున్నాడు. మరో స్టార్ డ్రాగ్ ప్లిక్కర్ సందీప్ సింగ్‌కు నిరాశ ఎదురైంది. అతడు రిజర్వ్ ధరకే అమ్ముడుపోయాడు. వేలంలో ఢిల్లీ వేవర్ రైడర్స్, ముంబయి మెజీషియన్స్, పంజాబ్ వారియర్స్, ఉత్తర్ ప్రదేశ్ విజార్డ్స్, రాంచీ రైనోస్, బెంగళూరు పాల్గొన్నాయి. ఈ లీగ్ జనవరి 17న ప్రారంభం కానుంది.

వేలంలో మొదటి స్థానంలో నిలిచిన సర్దార్ సింగ్‌ను ఢిల్లీ ఫ్రాంచైజీ 42.49 లక్షల రూపాయలకు కొనుగోలు చేసింది. రఘునాథ్‌ను నాటకీయ పరిణామాల మధ్య సహారా ఉత్తరప్రదేశ్ జట్టు 41.40 లక్షలకు సొంతం చేసుకుంది. రఘునాథ్ కోసం ఢిల్లీ, యుపి జట్లు చివరిదాకా పోటీపడ్డాయి. అతని ప్రాథమిక ధర 7.56 లక్షలు కావడం గమనార్హం. సందీప్ ప్రాథమిక ధర 15.13 లక్షల మొత్తానికే ముంబయి దక్కించుకుంది. ఆస్ట్రేలియా డిఫెండర్ జో కరోల్‌ను 30.39 లక్షలకు కొనుగోలు చేసిన ముంబయి.. సందీప్‌ను చౌకధరకు దక్కించుకుంది. ఈ పరిణామాన్ని సందీప్ జీర్ణించుకోలేకపోయాడు. అత్యధిక ధరకు అమ్ముడయిన సర్దార్ సంతోషం వ్యక్తం చేశాడు. యువ డిఫెండర్ రూపిందర్ పాల్ సింగ్ (ప్రాథమిక ధర 5.03 లక్షలు) ఊహించని ధర పలికాడు. రూపిందర్‌కు ఢిల్లీ 30.48 లక్షలు చెల్లించింది.