Posted: 01/21/2013 12:42 PM IST

టీం ఇండియాకు కాస్త ఊరట లభించే విషయమే ఈ విషయం. గత కొద్ది రోజుల నుండి పరాజయాల పాలవుతూ అందరి విమర్శలు ఎదుర్కొంటున్న టీం ఇండియా ఐసీసీ వన్డే ర్యాంకింగ్ లో మొదటి స్థానానికి ఎగబాకి ఔరా అనిపించుకుంది. ఇంగ్లాండ్‌తో జరుగనున్న ఐదు మ్యాచ్‌ల సీరీస్‌ను స్విప్‌ చేస్తేనే వన్డేల్లో నంబర్‌-1 ర్యాంకు సాధ్యమవుతుందనుకున్న తరుణంలో ఆరంభంలో ఓమ్యాచ్‌ కోల్పోయిన భారత్‌ ఇంకా రెండు వన్డేలు ఆడాల్సి ఉండగానే ఐసీసీ వన్డే చాంపియన్‌షిప్‌ ర్యాంకింగ్స్‌లో అగ్రస్ధానానికి చేరుకుంది. కొచీ, రాంచీలలో భారత్‌ సాధించిన ఘన వియాలకు తోడు శనివారం నాడు న్యూజిలాండ్‌ చేతిలో దక్షణాఫ్రికా ఓటమి పాలవ్వడంతో భారత్‌ టాప్‌-1లోకి దూసుకుపోయింది. ప్రస్తుత రేటింగ్స్‌ ప్రకారం 119 పాయింట్లతో భారత్‌ అగ్రస్థానంలో నిలువగా.. తర్వాతి స్థానంలో ఇంగ్లాండ్‌ 118 పాయింట్లతో రెండో స్థానంలో, 116 పాయింట్లతో దక్షిణాఫ్రికా మూడో స్థానంలో కొనసాగుతున్నాయి.