అల్లుడు గారు హాజరు కావాల్సిందే

Posted: 05/24/2013 01:17 PM IST

ఐపీఎల్ టి20 క్రికెట్ లీగ్ టి 420 లీగ్ గా మారింది. దీనికి కారణం ఇటీవల బయటపడిన స్పాట్ ఫిక్సింగ్ ఉదంతమే. ఈ ఫిక్సింగ్ ఆరోపణలు రోజు రోజుకు కొత్త మలుపులు తిరుగుతుంది. తాజాగా ఈ ఫిక్సింగ్ ఉదంతం రాజస్థాన్ జట్టు సభ్యులకే కాకుండా భారత్ క్రికెట్ పెద్ద అయిన శ్రీనివాసన్ అల్లుడు, చెన్నై సూపర్ కింగ్స్ జట్టు సీఈఓ అయిన గురునాథ్ మెడకు చుట్టుకునే విధంగా ఉన్నది. ఇప్పటికే ఈ కేసులో ఆటగాళ్ళతో పాటు బాలీవుడ్ నటుడు ధారాసింగ్ కొడుకు వింధూదారా సింగ్ ని పోలీసులు అరెస్టు చేసిన విషయం తెలిసిందే. ఈయన విచారణ సమయంలో చెప్పిన విషయాలు మరింత విస్మయంగా ఉన్నాయి. దీంతో ముంబై పోలీసులు బీసీసీఐ శ్రీనివాసన్ అల్లుడు గురునాథ్ కి నోటీసులు పంపడమే కాకుండా, నేటి (శుక్రవారం) ఉదయం 11 గంటల నుంచి సాయంత్రం 5 గంటల్లోగా ముంబై క్రైమ్ బ్రాంచ్ ముందు హాజరు కావాలని ఆదేశించారు. అంతకుముందు ఉదయం చెన్నైలోని గురునాథ్ ఇంటికి ఇద్దరు సభ్యుల పోలీసుల బృందం విచారణ కోసం వచ్చినా అతడు అందుబాటులో లేడు. కానీ ఈ సమన్ల పై మాత్రం స్పందించాడు. మరో రెండు రోజుల్లో చెన్నై ఫైనల్ మ్యాచ్ ఉన్నందున తనకు మరికొంత సమయం ఇవ్వాలని, ఆ మ్యాచ్ తరువాత విచారణకు హాజరవుతానని ఆయన ఓ లేఖను క్రైం బ్రాంబి పోలీసులకు పంపిన లేఖలో ఉన్నట్లు సమాచారం. ఆయన విన్నపాన్ని పరిశీలనలో ఉంచామని పోలీసులు చెబుతున్నారు. ఏది ఏమైనా అల్లుడుగారి మెడకు ఫిక్సింగ్ భూతం పడితే క్రికెట్ పెద్ద అయిన మామగా ఏ విధంగా స్పందిస్తాడో చూడాలి.