నా జీవితంలో విరాట్ ప్రభావం లేదు : అనుష్క

Posted: 03/10/2015 01:26 PM IST

భారత స్టార్ బ్యాట్స్ మన్ విరాట్ కోహ్లీ, బాలీవుడ్ నటి అనుష్కశర్మల మధ్య గతకొన్నాళ్ల నుంచి గాఢమైన ప్రేమాయణం సాగుతున్న విషయం తెలిసిందే! ఆ మధ్య వీరిద్దరూ చట్టాపట్టాలేసుకుని తిరగడం, రాత్రిళ్లు పార్టీలు-పబ్ కు తిరగడం వంటివి అన్నీ జరిగిపోయాయి. అంతేకాదు.. ఇద్దరూ కలిసి విదేశాలకు వెళ్లి హాయిగా తన లైఫ్ ని ఎంజాయ్ కూడా చేశారు. ఇప్పుడు ఈ ప్రేమజంట పెళ్లి చేసుకునే ఆలోచనల్లో మునిగిపోయారు.

ఇదిలావుండగా.. ఆమధ్య జరిగిన ఇంగ్లాండ్ పర్యటనలో భాగంగా కోహ్లీ ప్రదర్శన అత్యంత దారుణంగా సాగిన విషయం గుర్తుండే వుంటుంది. కోహ్లీ అలా విఫలం అవడానికి అనుష్కతో ప్రేమాయణం నడపడమే కారణమని అప్పట్లో తీవ్రమైన పుకార్లు కూడా వచ్చాయి. ఈ విషయంపై ఆ జంట ఆనాడు స్పందించలేదు కానీ.. తాజాగా ఈ విషయంపై అనుష్క తీవ్రంగా స్పందించింది. ఓ ఆంగ్ల ఛానెల్ కు ఇచ్చిన ఇంటర్వ్యూలో భాగంగా మాట్లాడిన ఆమె.. అసలు తన జీవితంలో విరాట్ ప్రభావమే లేదని ఆమె తేల్చి చెప్పింది.

ఈ నేపథ్యంలోనే అనుష్క మాట్లాడుతూ.. ‘ఆనాడు కోహ్లీ వైఫల్యానికి నేనే కారణమని చెప్పడం సరికాదు. అది తొందరపాటు చర్య అవుతుంది. మైదానంలో ఆటపై తన ఏకాగ్రత, ప్రదర్శన విషయాల్లో నన్ను నిందించడం సరికాదు. నా వృత్తి జీవితంలో విరాట్ ప్రభావం లేదు. అదే సమయంలో నా ప్రభావం కూడా అతనిపై లేదు. అసలు విరాట్ సామర్థ్యంపై ఎందుకు అనుమానపడుతున్నారు? ఇండియా తరఫున అతను సాధించిన దాన్ని క్రెడిట్ గా గుర్తించండి.. ఓడిన వ్యవహారాలపై విమర్శించడం కాదు’ అని పేర్కొంది.