మూడో టెస్టుపై అభిమానుల ఉత్కంఠ.. ఫలితం తేలేనా..?

Posted: 08/13/2016 01:48 PM IST

నాలుగు టెస్టుల సిరీస్ లో భాగంగా వెస్టిండీస్ తో జరుగుతున్న మూడవ టెస్టులో ఫలితం తేలుతుందా.? లేక డ్రాగానే ముగుస్తుందా..? అన్న ప్రశ్నలు అభిమానుల్లో తలెత్తుతున్నాయి. తొలి టెస్టులో విజయం సాధించి పైచేయి సాధించిన టీమిండియా రెండో టెస్టు వరణుడి కారణంగా డ్రాగా మగించింది. ఇక మూడో టెస్టు కూడా వర్షం కారణంగా ఒక రోజు పూర్తి ఆటకు భంగం కలిగించింది. ఈ నేపథ్యంలో మూడో టెస్టు కూడా ఫలితం తేలకుండానే ముగుస్తుందా..? లేక ఫలితం వస్తుందా అన్న సందేహాలు క్రికెట్ అభిమానుల్లో రేకెత్తుతున్నాయి.

వెస్టిండీస్ను మూడో టెస్టు మ్యాచ్ తొలి ఇన్నింగ్స్లో 225 పరుగులకే కట్టడి చేసి పైచేయి సాధించిన భారత్ తన రెండో ఇన్నింగ్స్లో మూడు వికెట్లు కోల్పోయి 157 పరుగులు చేసింది. దీంతో భారత్కు 285 పరుగుల ఆధిక్యం లభించింది. నాల్గో రోజు ఆటలో భాగంగా క్రితం రోజు ఆట ముగిసే సమయానికి అజింక్యా రహానే(51 బ్యాటింగ్), రోహిత్ శర్మ(41) క్రీజ్లో ఉన్నారు.  ఆటకు శనివారం చివరిరోజు కావడంతో టెస్టు మ్యాచ్ డ్రా అయ్యే అవకాశం ఉంది. ఏమైనా అద్భుతాలు జరిగితే తప్ప మ్యాచ్ ఫలితం వచ్చే అవకాశం చాలా తక్కువగా ఉంది. కాగా, ఆఖరి రోజు ఆటలో భారత్ తన ఇన్నింగ్స్ ను తొందరగా ముగించి ఫలితం కోసం ప్రయత్నించే అవకాశం ఉంది.

అంతకుముందు భారత పేసర్ భువనేశ్వర్ కుమార్ ధాటికి వెస్టిండీస్ జట్టు కుప్ప కూలింది. భువనేశ్వర్ ఐదు వికెట్లు సాధించడంతో భారత్కు 128 పరుగుల తొలి ఇన్నింగ్స్ ఆధిక్యం లభించింది. విండీస్ ఇన్నింగ్స్లో బ్రాత్‌వైట్ (163 బంతుల్లో 64; 6 ఫోర్లు), మార్లన్ శామ్యూల్స్ (109 బంతుల్లో 48; 7 ఫోర్లు, 1 సిక్స్) మినహా మిగతావారు విఫలమయ్యారు. విండీస్ మిడిల్ ఆర్డర్, టెయిల్ ఎండర్స్ పూర్తిగా విఫలం కావడంతో కేవలం 225 పరుగులకే అలౌట్ అయ్యింది. ఈ సిరీస్లో భారత్ 1-0 ఆధిక్యంలో కొనసాగుతుంది. మూడో టెస్టులో ఫలితం రాబట్టి సిరీస్ ను కైవసం చేసుకోవాలని టీమిండియా వ్యూహరచన చేస్తుంది.

భారత తొలి ఇన్నింగ్స్ 353 ఆలౌట్, రెండో ఇన్నింగ్స్ 157/3

వెస్టిండీస్ తొలి ఇన్నింగ్స్ 225 ఆలౌట్