నా భర్త ఇళ్లంటూ వచ్చిన క్రికెటర్ మొహమ్మద్ షమీ భార్య అరెస్ట్

Posted: 04/29/2019 08:59 PM IST

టీమిండియా ఫాస్ట్ బౌలర్ మోహమ్మద్ షమీ భార్య హసీన్ జహాన్ ను పోలీసులు అదుపులోకి తీసుకున్నారు. తన భర్తపై ఆయన క్రికెట్ జీవితంపై సంచలన అరోపణలు చేసి.. బిసిసిఐ సైతం విచారణ కమిటీ వేసిన అతని నిజాయితీని నిర్థారించుకునేలా చేసిన ఈ భార్యమణి.. ఆయన వరల్డ్ కప్ జట్టులో స్థానం సంపాదించుకున్న తరువాత మళ్లీ వచ్చి రచ్చ రచ్చ చేసింది. ఉత్తరప్రదేశ్ లోని అమోహాలో ఉన్న షమీ నివాసానికి వెళ్లిన ఆమె... అతని బంధువులతో గొడవపడ్డారు.

దీంతో, రంగప్రవేశం చేసిన పోలీసులు ఆమెను అరెస్ట్ చేశారు. అనంతరం బెయిల్ పై ఆమె విడుదలయ్యారు. సాహస్ పూర్ అలీ నగర్ గ్రామంలోని షమీ నివాసానికి వెళ్లిన జహాన్ ను బయటకు వెళ్లాలని కుటుంబసభ్యులు కోరారు. అయితే, తన బిడ్డతో కలసి గదిలోకి వెళ్లి ఆమె తలుపు వేసుకున్నారు. సమాచారం అందుకున్న పోలీసులు అక్కడకు చేరుకున్నారు. అయితే, ఇరుపక్షాల మధ్య గొడవను ఆపడం సాధ్యంకాకపోవడంతో, చివరకు ఆమెను కస్టడీకి తీసుకున్నారు.

ఈ సందర్భంగా హసీన్ మాట్లాడుతూ, 'నేను నా భర్త ఇంటికి వచ్చా. ఇక్కడ ఉండే హక్కు నాకుంది. షమీ కుటుంబసభ్యులు నాతో తప్పుగా వ్యవహరిస్తున్నారు. అయినా పోలీసులు వాళ్లకే సహకరిస్తున్నారు. వాళ్లను అరెస్ట్ చేయాల్సింది పోయి... నన్ను పోలీస్ స్టేషన్ కు తీసుకొచ్చారు' అని మండిపడ్డారు. షమీకి, అతని భార్యకు మధ్య వివాదం నడుస్తున్న సంగతి తెలిసిందే. షమీపై ఆమె కేసు కూడా పెట్టారు. అదుపులోకి తీసుకున్న పోలీసులు అ తరువాత అమెను సొంతపూచికత్తుపై విడిచిపెట్టారు.