పిబిఎల్ ఛాంపియన్ గా దిల్లీ ఏసర్స్

Posted: 01/18/2016 04:06 PM IST

దేశవ్యాప్తంగా ఎంతో ఆసక్తిగా ఎదురుచూసిన ప్రీమియర్ బ్యాడ్మింటన్ లీగ్ లో దిల్లీ చాంపియన్ గా అవతరించింది. ఫైనల్ మ్యాచ్ లో దిల్లీ ఏసర్స్ 4-3 తేడాతో ముంబైని ఓడించి.. ఛాంపియన్ గా నిలిచింది. తొలి మ్యాచ్ గా జరిగిన మిక్స్-డ్ డబుల్స్ లో అక్షయ్ దేవాల్కర్-గాబ్రియెలా అడ్-కాక్ (ఢిల్లీ) ద్వయం 6-15, 12-15తో కామిల్లా జుల్-వ్లాదిమిర్ ఇవనోవ్ (ముంబై) జోడీ చేతిలో ఓడిపోయింది. దాంతో ఆ జట్టు 0-1తో వెనుకబడింది. అయితే రెండో మ్యాచ్ గా జరిగిన తొలి పురుషుల సింగిల్స్లో టామీ సుగియార్తో (ఢిల్లీ) 13-15, 15-9, 15-9తో హెచ్-ఎస్ ప్రణయ్ (ముంబై)ను ఓడించాడు. ఫలితంగా స్కోరు 1-1తో సమమైంది. మూడో మ్యాచ్ గా నిర్వహించిన పురుషుల డబుల్స్ లో కూ కీట్ కీన్-తాన్ బూన్ హెంగ్ (ఢిల్లీ) జోడీ 14-15, 15-10, 15-14తో మథియాస్ బో-వ్లాదిమిర్ ఇవనోవ్ (ముంబై) జంటను ఓడించింది.

దాంతో ఢిల్లీ 2-1 పాయింట్లతో ముందంజ వేసింది. అయితే నాలుగో మ్యాచ్ గా జరిగిన మహిళల సింగిల్స్ పోటీని ముంబై రాకెట్స్ తమ ‘ట్రంప్ మ్యాచ్’గా ఎంచుకుంది. ఈ మ్యాచ్ లో హాన్ లీ (ముంబై) 12-15, 15-8, 15-8తో పీసీ తులసీ (ఢిల్లీ)పై గెలిచింది. ‘ట్రంప్ మ్యాచ్’ నెగ్గినందుకు ముంబై ఖాతాలో రెండు పాయింట్లు చేరాయి. దాంతో ముంబై 3-2తో ఆధిక్యంలోకి వెళ్లింది. ఇక చివరి మ్యాచ్ గా జరిగిన రెండో పురుషుల సింగిల్స్ను ఢిల్లీ ఏసర్స్ జట్టు ‘ట్రంప్ మ్యాచ్’గా ఎంపిక చేసుకుంది. ఈ మ్యాచ్ లో రాజీవ్ ఉసెఫ్ 15-11, 15-6తో గురుసాయిదత్ (ముంబై)పై గెలుపొందాడు. దాంతో ఢిల్లీ ఏసర్స్ జట్టుకు రెండు పాయింట్లు వచ్చాయి. ఫలితంగా ఓవరాల్ గా ఢిల్లీ 4-3 పాయింట్ల తేడాతో ముంబై రాకెట్ ను ఓడించి విజేతగా నిలిచింది.