‘పంజా’ దర్శకుడితో మరోసారి జతకట్టనున్న పవన్

Posted: 09/18/2015 06:54 PM IST

Pawan kalyan next project with panja director vishnu vardhan

2011లో పవన్ హీరోగా వచ్చిన ‘పంజా’ సినిమా గురించి అందరికీ తెలిసే వుంటుంది. ఆమధ్య భారీ అంచనాల నడుమ విడుదలైన ఆ సినిమా ఘోరంగా పరాజయం పాలయి, అభిమానుల్ని తీవ్ర నిరాశకు గురి చేసింది. దీంతో.. ఆ సినిమా తెరకెక్కించిన కోలీవుడ్ దర్శకుడు విష్ణువర్ధన్.. మళ్లీ టాలీవుడ్ పై దృష్టి పెట్టలేదు. కానీ.. ఈ ఫెయిల్యూర్ తర్వాత తమిళంలో అతను తీసిన రెండుమూడు సినిమాలు భారీ విజయాలు సాధించాయి. అందులో ‘ఆరంభం’ సినిమా వందకోట్ల క్లబ్ లోకి చేరి, విష్ణుకి భారీ విజయాన్ని అందించింది. ఆ సినిమాతో విష్ణు కెరీర్ ఒక్కసారిగా మలుపు తిరిగింది. అందుకేనేమో.. తెలుగులోనూ తన అదృష్టాన్నీ మరోసారి పరీక్షించుకోవాలని భావిస్తున్నట్లు తెలుస్తోంది.

‘పంజా’తో ఘోర పరాజయం చవిచూసిన విష్ణు.. పవన్ తోనే మరో సినిమా తెరకెక్కించి భారీ విజయాన్ని అందుకోవాలని భావిస్తున్నడట. ఇప్పటికే పవన్ తో మంతనాలు జరిపినట్లు వార్తలొస్తున్నాయి. ఇదివరకెన్నడూలేని సరికొత్త సినిమా లైన్ ని పవన్ కి విష్ణు వినిపించాడని, అది తనకి నచ్చడంతో డెవలప్ చేయమని పవన్ చెప్పాడని ఇండస్ట్రీలో చెప్పుకుంటున్నారు. నిజానికి.. ఏదైనా ఓ డైరెక్టర్ ఫెయిల్యూర్ అందిస్తే మరోసారి అతనితో కలిసి చేసేందుకు ఏ హీరో ఆసక్తి చూపించడు. కానీ.. పవన్ మాత్రం అందుకు భిన్నంగా ఆలోచిస్తాడని మరోసారి నిరూపితమైందని అనుకుంటున్నారు. జయాపజయాలను పక్కన పెడితే, దర్శకులలో గల ప్రతిభను గుర్తించడంలోనూ.. ఛాన్స్ ఇవ్వడంలోనూ పవన్ ఎప్పుడూ ముందే వుంటాడు. అందుకే గతంలో విష్ణు ఇచ్చిన ఫెయిల్యూర్ ని పట్టించుకోకుండా, అతడు చెప్పిన లైన్ విని, దాన్ని డెవలప్ చేయమని చెప్పాడని అంటున్నారు.

ఇక పవన్ తన సినిమాకు ఎలాగో గ్రీన్ సిగ్నల్ ఇచ్చేశాడు కాబట్టి.. తాను వినిపించిన ఆ స్టోరీ లైన్ ని డెవలప్ చేసే పనిలో విష్ణు మునిగిపోయినట్లు తెలుస్తోంది. ఈ సినిమా కథను త్వరలోనే పూర్తి చేసి, షూటింగ్ ప్రారంభించాలనే యోచనలో విష్ణు వున్నట్లు తెలిసింది. ప్రస్తుతం పవన్ నటిస్తున్న ‘సర్దార్ గబ్బర్ సింగ్’ సినిమా షూటింగ్ పూర్తి కాగానే, ఆ సినిమా సెట్స్ పైకి వెళుతుందని సమాచారం.