రక్తపోటును తగ్గించే హెల్దీ ఫుడ్స్

Posted: 07/23/2015 11:25 AM IST

వాతావరణ పరిస్థితులు, మారుతున్న జీవన విధానాల కారణంగా ప్రజలు రకరకాల రోగాల బారిన పడుతున్నారు. ఆరోగ్యకరమైన చిట్కాలను ఎన్ని పాటించినప్పటికీ.. కొన్ని సమస్యలు మాత్రం నిత్యం వెంటాడుతూనే వుంటున్నాయి. అటువంటి వాటిల్లో బీపీ (రక్తపోటు) ఒకటి. ఈ వ్యాధి ఒక్కసారి వచ్చిందంటే దీని నుంచి ఉపశమనం పొందడం అసాధ్యం. కానీ.. కొన్ని చిట్కాల ద్వారా ఈ సమస్యను తగ్గించుకోవచ్చని ఆరోగ్య నిపుణులు అంటున్నారు. నిజానికి బీపీని తగ్గించుకునేందుకు ఎన్నో మార్గాలున్నప్పటికీ.. అవి శరీరానికి ఏదో ఒక రకంగా హాని కలిగిస్తాయని పరిశోధనలు వెల్లడిస్తున్నాయి. దీంతో శాస్త్రజ్ఞులు బీపీని తగ్గించుకునే సరికొత్త మార్గాలను ప్రవేశపెడుతున్నారు. అవి ఏంటో తెలుసుకుందామా...

ప్రతిరోజూ ఒక యాపిల్‌ను తొక్క తీయకుండా తింటే రక్తపోటును తగ్గించుకోవచ్చని నిపుణులు తమ పరిశోధనల ద్వారా వెల్లడిస్తున్నారు. ఎందుకంటే.. యాపిల్ లో ఎన్నోరకాల పోషకాలు, విటమిన్లు, మినరల్స్ వంటివి వుంటాయి. అవి బీపీని కంట్రోల్ లో వుంచుతాయి. బీపీను తగ్గించే ఔషధ గుణాలు యాపిల్ తొక్కలో ఆరు రెట్లు ఎక్కువ ఉన్నాయని, కాలంతో సంబంధం లేకుండా దొరికే పండు కనుక రోజుకో యాపిల్ తీసుకోవడం వల్ల బీపీకు చెక్ పెట్టవచ్చంటున్నారు వైద్యులు. కేవలం ఆపిల్ మాత్రమే కాదు.. గ్రీన్ టీ, బ్లూ బెర్రీస్ తీసుకోవడం వల్ల కూడా బీపీని తగ్గించుకోవచ్చని నిపుణులు సలహా ఇస్తున్నారు. ఈ మూడింటిని రెగ్యులర్ గా తీసుకుంటే.. బీపీ సమస్యను చాలావరకు తగ్గించుకోవచ్చని ఆరోగ్య నిపుణులు అంటున్నారు.