ఆమ్లా తీసుకోండి.. ఆరోగ్యంగా వుండండి..

Posted: 11/10/2015 11:37 AM IST

ఆరోగ్యాన్ని మేలుచేసే ఆహారాల్లో ఉసిరికాయ ఒకటి. ఇందులో వుండే ఔషధగుణాలు రకరకాల వ్యాధుల నుంచి ఉపశమనం కలిగించడంతోపాటు నిత్యం ఆరోగ్యంగా మెలిగేందుకు సహాపడుతాయని ఆరోగ్య నిపుణులు తమ పరిశోధనల ద్వారా స్పష్టం చేస్తున్నారు. యాంటీ-బ్యాక్టీరియా లక్షణాలను కలిగివున్న ఉసిరి పొడిని రోజుకు అరస్పూన్ తీసుకుంటే.. వ్యాధినిరోధక శక్తి పెరగుతుందని అంటున్నారు. దాంతో.. రోజంతా ఎంతో ఉత్సాహంగా వుంటూ అన్ని కార్యకలాపాల్లో చురుకుగా పాల్గొనవచ్చునని చెబుతున్నారు. అంతేకాదు.. ఈ ఉసిరిలో వుండే విటమిన్లు ముఖానికి మరింత అందాన్ని చేకూరించి.. నిత్య యవ్వనులుగా వుండేలా ప్రేరేపిస్తుందని బ్యూటీషియన్లు వెల్లడిస్తున్నారు.

ఉసిరికాయలో విటమిన్-సి, క్యాల్షియం, ఫాస్పరస్, ఇనుము, విటమిన్-బి కాంప్లెక్స్ వంటివి పుష్కలంగా ఉన్నాయి. ఇవి నీరసం, అలసటను తగ్గించడంలో ప్రధానపాత్రను పోషిస్తాయి. అంతేకాకుండా ఉసిరికాయ జ్యూస్ తీసుకుంటే అలసత్వానికి చెక్ పెట్టవచ్చు. అయితే శరీరానికి ఇది చలవ చేయడం వల్ల వర్షాకాలంలో కాస్త తక్కువ మోతాదులో వీటిని తీసుకోవాలని వైద్యులు అంటున్నారు. ఉసిరి శిరోజాల సంరక్షణలో మెరుగ్గా పనిచేస్తుంది. అందుకే ప్రస్తుత హెయిల్ ఆయిల్ బ్రాండ్లలో ఉసిరికాయ కీలక పాత్ర పోషిస్తోంది. ఎసిడిటీ, జీర్ణ సంబంధిత వ్యాధులకు రోజువారీగా ఉసిరికాయ పొడిని లేదా జ్యూస్‌ను ఉపయోగిస్తే మంచి ఫలితం ఉంటుంది. ఇంకో ముఖ్యమైన విషయం ఏమిటంటే.. ఉసిరికాయ గుండెకు ఎంతో మేలుచేస్తుంది. హృదయ కండరాలను పటిష్టం చేస్తుంది. రక్తంలోని హీమోగ్లోబిన్ శాతాన్ని పెంచుతుంది. మన శరీరంలోని ఉష్ణాన్ని తగ్గించి, వ్యాధులను దరిచేరనివ్వదని ఆరోగ్య నిపుణులు అంటున్నారు.

అయితే.. ఈ ఉసిరిని మోతాదుకు మించి తీసుకోకూడదని ఆరోగ్య నిపుణులు హెచ్చరిస్తున్నారు. డాక్టర్ల సలహా మేరకు వీటిని తక్కువ పరిమాణంలో సమయానుకూలంగా తీసుకుంటే ఎంతో శ్రేయస్కరమని సచిస్తున్నారు. వేసవిలో అధికంగాను, వర్షాకాలంలో చాలా తక్కువ మోతాదులో ఉసిరిని తీసుకోవాలని చెబుతున్నారు.