Posted: 01/14/2012 03:46 PM IST

అవినీతికి వ్యతిరేకంగా తనదైన శైలిలో యోగాసనాలు, వ్యాయామాలతో కూడిన దీక్షను చేపట్టే రామ్ దేవ్ బాబా ఈ రోజు ఢిల్లీలో మీడియా సమావేశంలో తన భవిష్యత్ప్రణాళికను విశదీకరిస్తుండగా, ఒక వ్యక్తి ఆయన మీద నల్ల సిరాను చల్లాడు. దానితో బాబా అనుచరులు అతన్ని పట్టుకుని చితక బాదేసారు. సమయానికి పోలీసులు స్పందించి ఆ వ్యక్తిని అదుపులోకి తీసుకోబట్టి సరిపోయింది. భక్తితో కొలిచే దేవుడిని, శ్రధ్ధతో గౌరవంతో చూసే గురువులను, ప్రాణం కన్నా మిన్నగా ప్రేమించే మనుషులను ఎవరైనా ఏమైనా అంటే, ఎంతటి క్రమశిక్షణతోనూ నిబద్ధతోనూ ఉన్నవారికైనా ఆవేశం కట్టలు తెంచుకుంటుందని నిరూపించిన రామ్ దేవ్ బాబా అనుచరుల మీద, అంతకంటే ఎక్కువ హింసారోపణలు రాకుండా పోలీసులు మధ్యలో కలుగజేసుకుని సాయపడ్డారు.

నల్లధనం గురించి మాట్లాడుతున్న బాబా ముఖం మీద నల్ల సిరా వేసిన ఆ వ్యక్తి ఢిల్లీ వాసని, అతని పేరు కమ్రాన్ సిద్దిఖ్వి అని, అతను బాట్ల హౌస్ ఎన్ కౌంటర్ మీద పిటిషన్ వేసిన స్వచ్ఛంద సంస్థ రియల్ కాజ్ లో సభ్యుడని తెలిసింది. చేతిలో వాకీ టాకీని పట్టుకుని సిద్ధిఖ్వి ఒక సెక్యూరిటీ ఆఫీసరనే సంకేతాన్నిస్తూ లోపలికి ప్రవేశించాడు.

సిరా దాడి జరిగిన వెంటనే సమావేశాన్ని నిలిపివేసిన రామ్ దేవ్ బాబా, నేనేమో నల్లధనానికి అక్రమ సంపాదనలకు వ్యతిరేకంగా పోరాడుతుంటే నాకు లభించిన గౌరవం ఇది అంటూ వాపోయారు. అవినీతి గురించి ఉపన్యాసమివ్వటంలో మునిగిపోయివున్న రామ్ దేవ్ బాబా, 2008లో జరిగిన బాట్లా హౌసి ఎన్ కౌంటర్ గురించి బాబా ఉద్దేశ్యమేమిటని సిద్ధిఖ్వి అడిగిన ప్రశ్నను బాబా పట్టించుకోకపోవటంతో కోపగించిన సిద్దిఖ్వి సిరా విదిలించాడు.  దానితో రామ్ దేవ్ బాబా ముఖం మీద ఎడమ కంటి మీదుగా నల్ల సిరా మరక పడింది. అది చూసి తట్టుకోలేని ఆయన అనుచర బృందం సిద్దిఖ్వి సంగతి చూసారు.

-శ్రీజ