Posted: 01/15/2012 03:25 PM IST

2004 నుంచీ ఫెర్రో ఎల్లోయ్స్ కి చెందిన 24 కంపెనీలకూ సరఫరా చేసిన విద్యుత్తు మీద ఇతర పరిశ్రమలకంటే తక్కువ ఛార్జ్ చెయ్యటం వలన ఇప్పటివరకూ 1125 కోట్ల రూపాయల రాయితీలను పొందాయా సంస్థలు. సాధారణ మధ్యవర్గాలకు 50 యూనిట్లు దాటిన తర్వాత రూ.2.80 వసూలు చేస్తుండగా ఫెర్రో ఎల్లోయ్స్ కంపెనీలనుంచి మాత్రం ప్రభుత్వం రూ. 2.65 మాత్రమే వసూలు చేస్తూవస్తోంది. హెచ్ టి 1 కేటగరీలో ఉన్న ఇతర 7922 పరిశ్రమలకు ఈ సదుపాయం ఇవ్వలేదు. పరిశ్రమలన్నిటినీ వదిలిపెట్టి కేవలం ఫెర్రో ఎల్లాయ్స్ మీద ఏమిటీ ఆప్యాయత ఎందుకంత అనురాగమన్నది ఎవరికీ అంతుచిక్కటం లేదు. పర్యావరణాన్ని కాపాడే దిశగా ఏమైనా పనిచేస్తున్నాయా లేకపోతే ప్రజాప్రయోజనకరమైన ఐరన్ అండ్ స్టీల్ ఉత్పత్తులనేమైనా తయారుచేస్తున్నారా లేక చౌకగా ఇస్తున్నారా మరేమైనా కారణముందా అంటే ఏమీ కనపడటంలేదు. అలా జరిగిపోతున్నదంతే.

ఇప్పటికైనా కళ్ళు తెరచిన విద్యుత్ శాఖ ఫెర్రో ఎల్లయ్స్ పరిశ్రమలను కూడా హెచ్ టి 1 (ఎ) కేటగరీ లోకి మార్చి వేసి ఈ సంవత్సరం నుంచి మిగిలిన పరిశ్రమలకు మాదిరిగానే రూ.4.42 వసూలు చెయ్యాలని చేసిన ప్రతిపాదనను ప్రభుత్వం ఆమోదించింది. విద్యుత్ సంస్థల ఉన్నతాధికారులంతా ఈ విషయంలో పట్టుబట్టి ముఖ్యమంత్రిని ఒప్పించటం గమనార్హం. ఈ మార్పు వలన సంవత్సరానికి 300 కోట్ల ఆదాయం పెరుగుతుందని వారంతా లెక్కకట్టి చెప్పారు.

అయితే 2004-05 నుంచి ఇప్పటివరకూ అంటే 2011-12 వరకూ ఈ విద్యుత్ రాయితీని అనుభవించిన ఫెర్రో ఎల్లాయిస్ సంస్థలు ఈ విషయంలో ప్రభుత్వానికి నచ్చచెప్దామని చూస్తున్నాయి.

-శ్రీజ