Posted: 04/12/2012 11:58 AM IST

బాలీవుడ్ బాద్ షా షారూఖ్ ఖాన్ పై కేసు నమోదు అయింది. నిన్న సవాయ్ మాన్ సింగ్ స్టేడియంలో ఆయన బహిరంగంగా సిగరెట్ తాగాడు. దీంతో ఆయన పై స్థానిక చీఫ్ జ్యుడీషియల్ మేజిస్ట్రేట్ కోర్టులో ఫిర్యాదు నమోదైంది. ఐపీఎల్‌లో భాగంగా ఆదివారం రాజస్థాన్ రాయల్స్, కోల్‌కతా నైట్ రైడర్స్ మధ్య జరిగిన మ్యాచ్‌లో షారూక్ సిగరెట్ తాగాడు. ఈ తతంగమంతా ప్రత్యక్ష ప్రసారంలో కనిపించడంతో జైపూర్ క్రికెట్ అకాడమీకి చెందిన రాథోడ్ సింగ్ స్పందించి కోర్టులో కేసు వేశారు.

'బహిరంగంగా పొగతాగడాన్ని రాజస్థాన్ ప్రభుత్వం 2000 సంవత్సరంలో నిషేధించింది. వేలాది మంది అభిమానుల ముందు షారూక్ ఖాన్ పొగ తాగాడు. ఈ నెల 12న దీనిపై విచారణ జరుగుతుంది'. అంతేకాదు.. మామూలు ప్రేక్షకులను స్టేడియంలోకి వాటర్ బాటిళ్లు కూడా తీసుకెళ్లనివ్వరని, అలాంటిది షారుక్ సిగరెట్లతో ప్రవేశిస్తుంటే ఎలా అనుమతించారని ప్రశ్నించారు. స్టేడియంలో షారూక్ పొగ తాగడం పోలీసుల వైఫల్యమేనని ఆ పిటిషన్లో పేర్కొన్నట్లు న్యాయవాది తెలిపారు. పొగ మానాలని ప్రచారం చేయాల్సిన సెలబ్రెటీలే ఈ విధంగా బహిరంగా పొగ తాగడం ఏ మాత్రం బాగోలేదని పలువురు అభిప్రాయ పడుతున్నారు.