Posted: 04/12/2012 11:54 AM IST

మత ఘర్షణలు చెలరేగిన హైదరాబాద్ పాతబస్తీలో ప్రశాంత వాతావరణం ఇప్పుడిప్పుడే చోటు చేసుకుంది  సౌత్, ఈస్ట్ జోన్స్‌లోని మాదన్నపేట, సైదాబాద్ ఠాణాల పరిధిలో నేడు ఎనిమిది గంటల పాటు కర్ఫ్యూను సడలించారు. ఉదయం తొమ్మిది గంటల నుంచి సాయంత్రం ఐదు గంటల వరకు సడలింపు కొనసాగుతుంది. బుధవారంనాడు పోలీసులు కర్ఫ్యూ ఎత్తివేయడంతో మూడు రోజుల పాట ఇళ్లకే పరిమితమైన ప్రజలు ఒక్కసారిగా రోడ్ల మీదికి వచ్చారు. నిత్యావసర సరుకులు కొనుక్కోవడానికి వారు ఎగబడ్డారు.

ఈ సమయంలో అవాంఛనీయ ఘటనలకు తావు లేకుండా భారీ బందోబస్తుతో పాటు పారా మిలటరీ బలగాలను భారీగా ఏర్పాటు చేశారు. బుధవారం నాలుగు గంటల పాటు కర్ఫ్యూను సడలించిన విషయం తెలిసిందే. ఆదివారంనాడు చోటు చేసుకున్న హింసాత్మక సంఘటనలకు సంబంధించి పోలీసులు బుధవారం మరో నలుగురిని అదుపులోకి తీసుకున్నారు. మంగళవారంనాడు ఏడుగురిని అరెస్టు చేశారు. కాగా నేటి పరిస్థితిని అంతా సక్రమంగా ఉంటే రేపు శుక్రవారం మసీదు ప్రార్థన సందర్భంగా కర్ఫ్యూ సడలింపుపై నిర్ణయం తీసుకోనున్నారు.