Posted: 04/24/2012 12:37 PM IST

వివాదాల జంటగా పేరు తెచ్చుకొని, ఊసరవెల్లి రంగులు మార్చినట్లు ఎప్పుడూ పార్టీలు మార్చుతూ ఉండే జీవిత రాజశేఖర్ లు త్వరలో బిజేపీలో చేరుబోతున్నారు. ఈ నెల 25 తారీఖును వారు వెంకయ్య నాయుడు సమక్షంలో ఉదయం 10.24 నిమిషాలకు చేరడానికి ముహూర్తం కూడా ఫిక్స్ చేసుకున్నారు. ఈ మేరకు పార్టీ సీనియర్ నేతలతో రాజశేఖర్, జీవిత మంతనాలు జరిపినట్లు తెలుస్తోంది.

గతంలో దివంగత ముఖ్యమంత్రి రాజశేఖర్ రెడ్డి ఉన్నప్పుడు కాంగ్రెస్ లో ఉన్న వీరిద్దరు ఆయన మరణాంతరం ఆయన కొడుకు వైయస్సార్ పార్టీలో చేరిన విషయం తెలిందే. ఆయనతో విభేదాలు రావడంతో ఆయనకు దూరం అయ్యారు. తరువాత వారు కాంగ్రెస్ లోకే వెళదామని ప్రయత్నించినా, ఆ పార్టీలోకి చిరు పార్టీ విలీనం చేయడంతో తిరిగి వెళ్ళలేక సైలెంట్ అయిపోయారు. గత కొద్ది రోజుల క్రితం టీడీపీలో చేరడానికి తీవ్ర ప్రయత్నాలు చేశారని వార్తలు వచ్చాయి. అయితే పెట్టిన షరతులు బాబుకు నచ్చక పోవడంతో వీరిని ఆమడ దూరంలో ఉంచారు. గతంలో కొన్ని రోజులు మాజీ ముఖ్యమంత్రి భార్య అయిన లక్ష్మీ పార్వతికి వంత పాడారు. మొన్న బయట పడ్డ తారా చౌదరి సెక్స్ రాకెట్ ఉదంతంలో వీరి పాత్ర ఉన్నట్లు వచ్చిన వార్తలకు సమాధానం చెప్పకుండా తప్పించుకొని తిరుగుతూ... ఈ కేసుకు సంబంధించి రాజకీయ అండ కోసం బీజేపీలో చేరుతున్నట్లు సమాచారం.

హిందూ భావజాలాలు కలిగిన, ఎన్నో నీతులు జెప్పే జాతీయ పార్టీ అయిన బీజేపీ వాళ్ళు కూడా ఇలాంటి వాళ్ళని కూడా పార్టీలో చేర్చుకుంటుందా అని కొందరు అనుకుంటున్నారు. మరి వీరి చేరికతో కమలం వికసిస్తుందో లేక వాడిపోతుందో చూడాలి.