Posted: 07/14/2012 11:52 AM IST

 హైదరాబాద్‌లోని వనస్థలిపురం స్టేట్‌ బ్యాంక్‌ ఆఫ్‌ ఇండియాలో భారీ అగ్నిప్రమాదం జరిగింది. రాత్రి మూడు గంటల సమయంలో చెలరేగిన మంటలతో బ్యాంక్‌లో అధిక భాగం పూర్తిగా దగ్ధమైంది. దాదాపు 75 లక్షల రూపాయల ఆస్తినష్టం జరిగినట్లు బ్యాంక్‌ సిబ్బంది ప్రాధమిక అంచనా వేస్తున్నారు. బ్యాంక్‌లోని ఐదు కేబిన్‌లు, ఫర్నిచర్‌, కంప్యూటర్లు, క్యాష్‌ డిపాజిట్‌కు సంబంధించిన రెండు మిషన్‌లు పూర్తిగా కాలిపోయాయి. ఆ రెండు మిషన్‌ల విలువ 60 లక్షల రూపాయలని బ్యాంక్‌ అధికారులు తెలిపారు. షార్ట్‌ సర్కూట్‌ వల్లే ప్రమాదం జరిగిందని అనుమానిస్తున్నారు. బ్యాంక్‌కు సమీపంలో పోలీస్‌స్టేషన్‌ ఉండటంతో పోలీసులు వెంటనే స్పందించి అగ్నిమాపక సిబ్బందికి సమాచారమందించారు. వారు వెంటనే ప్రమాద స్థలానికి చేరుకుని మంటలను ఆర్పివేయటంతో పెద్ద ప్రమాదమే తప్పింది. ఖాతాదారుల డిపాజిట్‌లు, లాకర్లుకు సంబంధించి ఎలాంటి నష్టం జరగలేదని, ఆందోళన అవసరం లేదని బ్యాంక్‌ సిబ్బంది తెలిపారు.