Posted: 08/19/2012 05:48 PM IST

       విద్యార్థుల భవిష్యత్‌ను తీర్చిదిద్దాల్సిన అధ్యాపకులు వారిని మానసికంగా దెబ్బతీస్తున్నారు. అందరూ కాకపోయినా కొంత మంది గురువులు అమానుషంగా ప్రవర్తించడం గురుస్థానానికే అగౌరవాన్ని తెచ్చిపెడుతుండటం విచారకరం. గురువుల వేధింపులకు ఇంజనీరింగ్‌ చదువుతున్న విద్యార్థిని బలైంది. కన్నతండ్రి అకాల మరణాన్ని దిగమింగుకుని భవిష్యత్‌పై గంపెడు ఆశతో కాలేజీకి వెళ్లిన ఆ విద్యార్థిని మృతి చెందడం ఆ కుటుంబాన్ని కోలుకోని షాక్‌కు గురిచేసింది. రంగారెడ్డి జిల్లా కీసర మండలం చీర్యాల గ్రామంలోని గీతాంజలి ఇంజనీరింగ్‌ కాలేజీలో బిటెక్‌ రెండవ సంవత్సరం చదువుతున్న మౌనిక ఎప్పటిలాగే శనివారం కాలేజీకి వెళ్లింది. మధ్యాహ్నం కళాశాల రెండవ అంతస్తు మీద నుంచి కిందికి దూకింది. ఈ అఘాయిత్యానికి పాల్పడటానికి అధ్యాపకులు పద్మప్రియ కారణమని సహచర విద్యార్థులు ఆరోపిస్తున్నారు. లెక్చరర్‌ పద్మప్రియ అకారణంగా మౌనికను దూషించారని అది భరించలేక ఆమె ఆత్మహత్యకు పాల్పడినట్లు విద్యార్థులు అంటున్నారు. కాలేజీ భవనం పై నుంచి మౌనిక దూకిందన్న సమాచారం తెలుసుకున్న యాజమాన్యం హుటాహుటిన ఆమెను కుషాయిగూడలోని తులసి ఆసుపత్రికి తరలించారు. ఆమెను బతికించడానికి శ్రమించినా ఫలితం దక్కలేదు. మౌనిక కుటుంబం సైనిక్‌పురి గోకుల్‌నగర్‌లో నివాసం ఉంటోంది. తండ్రి జగదీశ్‌గౌడ్‌ ఇటీవలే మరణించారు. తల్లి పద్మ, కుటుంబ సభ్యులు ఆసుపత్రికి చేరుకుని బోరున విలపించారు. కుటుంబ బాధ్యతలు నిర్వర్తిస్తానని మౌనిక చెప్పిందని, ఇంతలోనే తమను వీడి వెళ్లిపోయిందని విలపిస్తున్నారు. ఇదిలావుండగా మౌనిక మృతిపై గీతాంజలి ఇంజనీరింగ్‌ విద్యార్థులు, విద్యార్థి సంఘాలు ఆందోళనకు దిగాయి. కీసర, కుషాయిగూడ పోలీసులు కేసు నమోదు చేసి దర్యాప్తు చేస్తున్నారు. మౌనిక మృతిపై విద్యార్థి సంఘాలు బందుకు పిలుపునిచ్చాయి. కాగా, మౌనిక మృతి ముమ్మాటికీ యాజమాన్య నిర్లక్ష్యమేనని ఎఐఎస్‌ఎఫ్‌ గ్రేటర్‌ అధ్యక్ష కార్యదర్శులు టి.సత్యప్రసాద్‌, కె.ధర్మేంద్ర ఆరోపించారు. మౌనిక కుటుంబాన్ని ఆదుకోవాల్సిన బాధ్యత కాలేజీ యాజమాన్యంపై ఉందని, తక్షణం ఆమె కుటుంబానికి రూ.20లక్షల ఎక్స్‌గ్రేషియా ప్రకటించాలని డిమాండ్‌ చేశారు.

...avnk