Posted: 11/20/2012 11:28 AM IST

బీహార్ రాజధాని పాట్నాలోని అదాలత్ గంజ్ ప్రాంతంలోని గంగా నది ఒడ్డుకు చేరుకున్నారు. అర్ఘ్య ప్రదానానికి అక్కడ వెదురుతో తాత్కాలికంగా నిర్మించిన వంతెనపైకి చేరుకున్నారు. పెద్దఎత్తున వంతెనపైకి చేరడంతో అది కాస్తా కుప్పకూలింది. ఒక్కసారిగా తొక్కిసలాట! ఈ తొక్కిసలాటలో 18 మంది మరణించారు. మరికొంతమంది గాయపడ్డారు. బీహార్‌లో ఛాత్ పండుగ సందర్భంగా రాత్రి చోటుచేసుకున్న విషాదమిది. క్షతగాత్రులను వెంటనే పాట్నా మెడికల్ కాలేజీ మరియు ఆస్పత్రికి తరలించారు. మృతుల సంఖ్య మరింత పెరిగే అవకాశం ఉందని భావిస్తున్నారు. ఒకరిని మించి మరొకరుగా తోసుకు రావడంతోనే వెదురుతో చేసిన వంతెన కుప్పకూలిందని, దాంతో తొక్కిసలాట జరిగిందని.. ఆసమయంలో అధికారుల నుంచి ఎలాంటి సాయం అందలేదని ప్రత్యక్ష సాక్షి వివరించారు.

భక్తులే బాధితులకు చేయూత అందించారు తప్ప, పోలీసుల సహాయం కోసం అరిచి గీపెట్టినా స్పందించలేదని ఆరోపించారు. అధికారులు వెంటనే స్పందించి ఉంటే మరికొంతమంది ప్రాణాలు కాపాడగలిగి ఉండేవాళ్లమన్నారు. తొక్కిసలాటలో వృద్ధులు, మహిళలే ఎక్కువగా మరణించారని మరో ప్రత్యక్ష సాక్షి తెలిపారు. భక్తుల మృతి పట్ల సోనియాగాంధీ తీవ్ర విచారం వ్యక్తం చేశారు. మృతుల కుటుంబాలకు సంతాపం తెలిపారు. కాగా.. ఛాత్ పూజను బీహారీలు ఏటా చాలా ఘనంగా చేసుకుంటారు. దీపావళి తర్వాత ఆరు రోజులపాటు ఈ పూజను నిర్వహిస్తారు. ఈ సందర్భంగా ప్రభుత్వం భద్రత ఏర్పాట్లు చేస్తుంది. అయినా ఈసారి ఇంత ఘోరం జరగడం గమనార్హం.