కాంగ్రెస్ ని ఆదుకున్నవి ఆంధ్రా కర్నాటకలే

Posted: 05/02/2013 11:21 AM IST

కర్నాటకలో ఎన్నికల సందర్భంగా రెండు రోజుల సుడిగాలి పర్యటనలో కాంగ్రెస్ పార్టీ ప్రచారం చేసిన ముఖ్యమంత్రి కిరణ్ కుమార్ రెడ్డి అక్కడి వాతావరణాన్ని పరిశీలించిన తర్వాత,  బెంగళూరు కాంగ్రెస్ పార్టీ ప్రధాన కార్యాలయంలో మాట్లాడుతూ, కర్నాటకలో కచ్చితంగా కాంగ్రెస్ పార్టీ అధికారంలోకి వస్తుందని చెప్పటమే కాకుండా, ఆ ఫలితాలు రాబోయే 2014 ఎన్నికలకు సూచి అని కూడా అన్నారు. 

కర్నాటకలో భారతీయ జనతాపార్టీ తో ప్రజలు విసిగిపోయి ఉన్నారని, ఈసారి కాంగ్రెస్ ఘనవిజయం సాధించటం ఖాయమని కిరణ్ కుమార్ రెడ్డి జోస్యం చెప్పారు.  అంతే కాకుండా అవే ఫలితాలు రాష్ట్రంలో కూడా 2014 ఎన్నికలలో చూస్తామన్న ఆశాభావాన్ని కూడా ప్రకటించారు.  గత చరిత్రను తలుచుకుంటూ కాంగ్రెస్ పార్టీకి ఆంధ్రా కర్నాటక రాష్ట్రాలు ఎప్పుడూ కంచుకోటలా కాపు కాసాయని, దేశంలో కాంగ్రెస్ పార్టీ ఒక్కటే సంఘటితపరచే పార్టీ యని కిరణ్ కుమార్ అన్నారు. 

కాకపోతే రెండు రాష్ట్రాల మధ్య జలవివాదాలను సామరస్యంతో పరిష్కరించుకోవటం అవసరమని, పోలవరం ప్రాజెక్ట్ పూర్తవుతూనే కర్నాటకకు 21 టిఎమ్ సిలు, మహారాష్ట్రకు 14 టిఎమ్ సి ల నీరు అందిస్తామని కిరణ్ కుమార్ అన్నారు. 

-శ్రీజ