హైద్రాబాద్ లో నరేంద్ర మోదీకి ఘనస్వాగతం

Posted: 08/11/2013 11:15 AM IST

షెడ్యూల్ ప్రకారం ఉదయం 10 గంటలకు హైద్రాబాద్ బేగంపేట విమానాశ్రయం చేరుకున్న గుజరాత్ ముఖ్యమంత్రి నరేంద్ర మోదీకి రాష్ట్ర అధ్యక్షుడు కిషన్ రెడ్డి, పార్టీ సీనియర్ నేతలు భండారు దత్తాత్రేయ, విద్యాసాగరరావు, ఈ మధ్యనే పార్టీలో చేరిన సీనియర్ నాయకుడు నాగం జనార్దన రెడ్డి తదితరులు ఘనస్వాగతం పలికారు. 

నవ భారత యువ భేరీ బహిరంగ సభకోసం హైద్రాబాద్ విచ్చేసిన నుండి మోదీ విమానాశ్రయం నుంచి బయలుదేరి పార్క్ హయాత్ హోటల్ కి వెళ్ళారు.  అక్కడ ఆయన 11.00 నుంచి మధ్యాహ్నం 1.00 గంట వరకు రాజకీయ ప్రముఖులతో మాటా మంతీ కావించి, 2.30 కి సినీ ప్రముఖులు, మాజీ న్యాయమూర్తులు, రిటైర్డ్ ఐపిఎస్ లు, వ్యాపారవేత్తలతో కలిసి తేనీటి విందులతో పరిచయాలు, మాటలు జరుపుతారు.

సాయంత్రం 4.30 కి లాల్ బహదూర్ స్టేడియంలో నవభారత యువ భేరీ కార్యక్రమంలో అందుకోసం ముస్తాబైన వేదిక మీద మోదీ ప్రసంగిస్తారు.  ఇప్పటికే లక్షల్లో టికెట్ కొనుక్కుని స్టేడియంకి రానున్న ప్రేక్షకులను మాత్రమే కాకుండా రాష్ట్రాన్నంతటినీ ఉద్దేశించి ఇచ్చే ఈ ప్రసంగం 2014 సాధారణ ఎన్నికల ప్రచారానికి నాందిగా భాజపా చేసే మొట్టమొదటి కార్యక్రమంగా హైద్రాబాద్ నుంచి జరగటంతో ఇది ప్రత్యేకతను సంతరించుకుంది. 

ఈ మధ్యకాలంలోనే ఎన్నికల ప్రచార సారధిగా పార్టీ తరఫునుంచి ఎన్నికైన నరేంద్ర మోదీ తన వాణీ ద్వారా యుద్ధ భేరీని మ్రోగించనున్నారు.  ఆయన ఈ బృహత్కర కార్యక్రమాన్ని ఎలా ప్రారంభం చేస్తారో తిలకించటానికి పార్టీలతో నిమిత్తం లేకుండా అందరూ ఉత్కంఠతో ఎదురుచూస్తున్నారు- మిత్ర వర్గాలు ఉత్సాహాన్ని నింపుకోవటానికైతే వైరి వర్గాలు ఆయన మాటలలోని తప్పులు వెదకటానికి.

-శ్రీజ