కేసీఆర్ కు చుక్కలు చూపిస్తానంటున్న టీడీపీ నేత

Posted: 07/16/2014 06:32 PM IST

(Image source from: tdp mla yerrabelli dayakar rao controversial comments on telangana cm kcr)

సార్వత్రిక ఎన్నికల అనంతరం ఇటు టీఆర్ఎస్ నేతలు ఆంధ్రప్రదేశ్ సీఎం నారాచంద్రబాబునాయుడిపై, అటు టీడీపీ నేతలు తెలంగాణ ముఖ్యమంత్రి కేసీఆర్ పై ఘాటుగా విమర్శలు చేసుకుంటూనే వస్తున్నారు. ఇప్పుడు తాజాగా కేసీఆర్ కు చుక్కలు చూపిస్తానంటూ మరో టీడీపీ నేత సంచలన వ్యాఖ్యలు చేసి, పెద్ద దుమారం రేకెత్తించారు.

తాజాగా టీడీపీ శాసన సభాపక్ష నేత అయిన ఎర్రబెల్లి దయాకరరావు తెలంగాణ ముఖ్యమంత్రి కేసీఆర్ మీద విరుచుకుపడ్డారు. ‘‘ఎన్నికల సందర్భంగా ప్రజలకు ఇచ్చిన హామీలను అమలు చేయకుండా విస్మరిస్తే.. కేసీఆర్ సంగతి చూస్తాను’’ అని ఆయనపై తీవ్రంగా విమర్శించారు. వరంగల్ జిల్లాలోని తొర్రూరు మండల కేంద్రంలో బుధవారం నిర్వహించిన పార్టీ కార్యకర్తల సమావేశంలో ఎర్రబెల్లి, కేసీఆర్ పై రకరకాల ఆరోపణలు చేశారు.

కేసీఆర్ తెలంగాణ రాష్ట్రంలో అధికారం చేపట్టి నెల రోజులు అవుతున్నప్పటికీ.. ఇంతవరకు ఆయన ఒక్క హామీ కూడా అమలు చేయలేదని... ఇప్పటినుంచైనా ప్రజల మీద ధ్యాసతో వారికిచ్చిన హామీలను పూర్తి చేయాలని ఆయన హెచ్చరించారు. అలా కానిపక్షంలో కేసీఆర్ కు చుక్కలు చూపిస్తాననే ధోరణిలో తీవ్రంగా మండిపడ్డారు. ఈయన వ్యవహరించిన తీరు రానురాను ఈ రెండు పార్టీల మధ్య ఎటువంటి విభేదాలను రేకెత్తిస్తుందోనని రాజకీయ విశ్లేషకులు చెప్పుకుంటున్నారు.

AS