వావ్... సింగపూర్ పర్యటన ఎంత బాగుందో! :కేసీఆర్

Posted: 08/26/2014 09:38 AM IST

Telangana cm kcr press meet about singapore tour

కేవలం సాంకేతికపరంగానే కాకుండా ఒక ప్రపంచ పర్యాటక ప్రాంతంగా వెలిగిన ‘‘సింగపూర్’’ లాంటి ప్రదేశాలను సందర్శించినప్పుడు అందరినోటా ‘‘వావ్’’ అనే మాట రాకతప్పదు. ప్రకృతికి ప్రతిరూపంగా ఎంతో అందమైన ప్రదేశాన్ని విహరించడానికి ప్రపంచం మొత్తం మీద ఎంతోమంది పర్యాటకులు నిత్యం వస్తూపోతూ వుంటారు. ఇక మన ఇండియన్స్ అయితే అక్కడ క్యూలో నిలబడిపోయి వుంటారు. అయితే ఇక్కడ మనం చర్చించుకుంటున్నది ప్రత్యేకంగా ప్రాంతం గురించిగానీ.. అక్కడికి వెళ్లే పర్యాటకుల గురించి కాదులెండి... ఆ ప్రాంతాన్ని సందర్శించిన తెలంగాణ సీఎం కేసీఆర్ గురించి! సింగపూర్ టూర్ అనంతరం ఆయన మీడియాతో మాట్లాడుతూ సింగపూర్ లో ఆయన అనుభూతి గురించి వివరిస్తూ ఇలా అభివర్ణించారు.

తన కెరీర్ లోనే మొట్టమొదటిసారిగా ఒక విదేశీ పర్యటన భాగంగా సింగపూర్ టూర్ కు వెళ్లిన కేసీఆర్... ఆ పర్యటన తనకు అద్భుమైన అనుభూతిని కలిగించిందని పేర్కొన్నారు. ఆర్థికాభివృద్ధిలో అగ్రరాజ్యమైన అమెరికా సరసన సింగపూర్ నిలిచిందని చెప్పిన ఆయన... ప్రతికూల పరిస్థితులను తట్టుకుని ఎలా అభివృద్ధి చెందాలో ఆ ప్రాంతం నిరూపించిందని కొనియాడారు. మంచినీరు సహా ప్రతి వస్తువును సింగపూర్ నుంచి దిగుమతి చేసుకోవాల్సిందేనని పేర్కొన్న ఆయన.. అక్కడి ప్రభుత్వ విధానాలు, ప్రజల భాగస్వామ్యం ఎంతో అమోఘంగా వుందని... అటువంటి విధానాలను ఇక్కడ కూడా పాటిస్తే చాలా త్వరగా అభివృద్ధి చెందవచ్చునని అభిప్రాయపడ్డారు. భూవైశాల్యం చాలా తక్కువగా వున్నప్పటికీ.. సింగపూర్ దానిని చాలా తెలివిగా పరిష్కరించిందని తెలిపారు.

ప్రజాప్రతినిధులకు సింగపూర్ లో శిక్షణ
మీడియా సమావేశంలోనే కేసీఆర్ మాట్లాడుతూ.. త్వరలోనే తమ ప్రజాప్రతినిధులందరినీ సింగపూర్ పంపాలనే ఆలోచన వుందని ఆయన తెలిపారు. అభివృద్ధి విషయంలో తెలంగాణ నేతలకు ప్రత్యేకంగా శిక్షణ ఇప్పించాల్సిందిగా అక్కడి ప్రధానిని కోరినట్లు ఆయన చెప్పారు. సింగపూర్ లోని అన్నిరంగాల ప్రగతిపై అధ్యయనం చేశానని పేర్కొన్న ఆయన... అటువంటి రంగాలను మన తెలంగాణాలోనూ ఏర్పాటు చేసే దిశగా ఆలోచనలు జరుపుతామని ఆయన వెల్లడించారు.