నారాలోకేష్ వల్లే టీడీపీ మంత్రులు కారెక్కారట!

Posted: 10/09/2014 09:20 PM IST

Tdp ministers talasani srinivas yadav and theegala krishna reddy controversial comments on nara lokesh chandrababu naidu tdp party

రాజకీయరంగంలో ఎప్పుడు, ఏం జరుగుతుందో.. స్నేహితులుగా వున్నవాళ్లు శత్రువులుగా ఎలా మారిపోతారోనన్న విషయానికి తాజాగా వెలుగులోకి వచ్చిన వార్తను నిదర్శనంగా చెప్పుకోవచ్చు. నిన్నమొన్నటివరకు టీడీపీ కండువా కప్పుకొని బాగా ఊగేసిన మంత్రులు తీగల కృష్ణారెడ్డి - తలసాని యాదవ్ లు ఒక్కసారిగా ఆ పార్టీని వీడి టీఆర్ఎస్ లోకి జంప్ అయిన విషయం తెలిసిందే! వాళ్లు పార్టీని వీడారో లేదో.. అప్పుడే టీడీపీ పార్టీ మీద విషం కక్కడం మొదలుపెట్టేశారు. అది ఇతర నాయకుల మీద కాదు.. ఏకంగా సీఎం తనయుడి నారాలోకేష్ మీదే విమర్శలు చేసేస్తున్నారు. ఆయన వల్లే వాళ్లు పార్టీని వీడుతున్నట్లుగా వ్యాఖ్యలు చేసి, సంచలనాన్నే సృష్టించారు.

కేవలం తెలంగాణ ప్రజలకు మంచి చేయడం కోసమే తాము పార్టీ మారామని చెప్పుకుంటున్న ఆ ఇద్దరు మంత్రులు.. ఒకరికి మంచి మరొకరు టీడీపీ పార్టీ మీద విమర్శలు గుప్పించేశారు. ఈ నేపథ్యంలోనే తీగల కృష్టారెడ్డి మాట్లాడుతూ.. తెలంగాణాలో అసలు నాయకులే లేనట్లుగా పార్టీ బాధ్యతలను నారాలోకేష్ కు అప్పగించడం ఆయన అవమానకరంగా భావించినట్లు పేర్కొన్నాడు. అలా చేయడం వల్లే ఆయన టీఆర్ఎస్ పార్టీలోకి చేరినట్లు తెలుపుతున్నారు. ‘‘పార్టీలో సీనియర్ నాయకులే లేనట్లుగా తెలంగాణ బాధ్యతల్ని లోకేష్ కు అప్పగించడం అవమానంగా భావించాం’’ అంటూ బాగానే మసాలా దట్టించేశారు.

ఇక తలసాని శ్రీనివాస్ యాదవ్ కూడా టీడీపీ మీద బాగానే విరుచుకుపడ్డారు. తెలంగాణలో కరెంటు కష్టాలకు చంద్రబాబే కారణమంటూ ఆయన సంచలన వ్యాఖ్యలను సంధించారు. సమావేశాల పేరుతో తమను పిలిచి.. అధికార టీఆర్ఎస్ పార్టీ మీద విమర్శలు చేయాల్సిందిగా తమ బాబు ఒత్తిడి తెస్తున్నారని ఆయన ఆరోపణలు చేశారు. అంతేకాదు.. త్వరలోనే తెలంగాణాలో టీడీపీ నేతలు చేపట్టే బస్సుయాత్ర కూడా కేవలం టీఆర్ఎస్ సర్కారును తిట్టడం కోసమేనంటూ బద్దలుకొట్టేశారు. దీంతో వీరిద్దరూ ప్రకటిస్తున్న సదరు వ్యాఖ్యలపై టీడీపీ పార్టీ నాయకులు తీవ్రంగా మండిపడుతున్నారని తెలుస్తోంది.