నిరాడంబరంగా, సామూహికంగా మంత్రి కూతురి పెళ్లి..

Posted: 11/20/2014 12:23 PM IST

Karnetama minister anjaneya does his daughter marriage in mass marriages stands ideal for everyone

ఆడపడచు పెళ్లంటే..కన్నవారికి ఓ బరువు. అంతేకాదు బాధ్యత, ఓ మధుర జ్ఞాపకం.. ఎంత లేని వారైన తమకు కలిగిన దాంట్లో.. కూతరు పెళ్లిని అంగరంగ వైభవంగా జరపాలని చూస్తారు. ఇక ఉన్నవారి విషయం చెప్పనక్కర్లేదు. ముత్యాల పందిళ్లు, రత్నాల తలంబ్రాలు, ఘుమఘుమలాడే ప్రత్యేక వంటలు, రెడ్ కార్పెట్ డిన్నర్ మాదిరిగా వుంటుంది. ఇందుకు హైదరాబాద్ ఫలక్ నుమా ప్యాలెస్ హోటల్ లో జరిగిన సల్మాన్ ఖాన్ సోదరి అర్పిత ఖాన్ వివాహమే తాజా ఉదాహరణ. అయితే వీటన్నింటికీ భిన్నంగా తన కూతరు పెళ్లి జరిపించాడు ఓ మంత్రి. భిన్నంగా అంటే ఎలా అంటారా..?

ఆడపిల్ల పెళ్లంటే.. ఖర్చుకు వెనకాడకుండా.. అప్పు చేసైనా పెళ్లిళ్లు చేసే ఈ రోజులలో కర్ణాటక రాష్ట్రంలోని సాంఘిక సంక్షేమ శాఖా మంత్రి తన కుమార్తె అనుపమ వివాహాన్ని అతి నిరాడంబరంగా, సామూహికంగా జరిపించారు. మంత్రి ఆంజనేయ తన కుమార్తె వివాహాన్ని ఎలాంటి ఆర్భాటం లేకుండా చాలా సాధారణంగా నిర్వహించారు. తన కుమార్తె కోసం దాచిన మొత్తంతో సామూహిక వివాహాలను నిర్వహించి.. అదే వేదికపై తన కుమార్తె వివాహాన్ని సైతం జరిపించి నేటి తరం రాజకీయ నేతలందరికీ ఆదర్శంగా నిలిచారు. పుట్టింటి వాళ్లు ఎంత పెట్టినా.. ఇంకా ఇది కావాలి, అది కావాలని పేచీ పెట్టుకుంటున్న అమ్మాయిలు వున్న ఈ కాలంలో.. తన తండ్రికి కలిగిన మంచి ఆలోచనను యధాతధంగా అమలు పర్చేలా చేసిన మంత్రిగారి కూతరు, అలుళ్లకు కూడా అభినందనలు వెల్లివిరుస్తున్నాయి.

చిత్రదుర్గం జిల్లా హొళల్కెరె పట్టణంలోని కొట్రనంజప్ప కాలేజీ ఆవరణలో మంత్రి జే.ఆంజనేయ నేతత్వంలో 97 జంటలకు ఉచిత సామూహిక వివాహాలు జరిగాయి. ఈ వేధికపైనే మంత్రి తన కుమార్తె అనుపమతో శాశ్వత్ వివాహం కూడా జరిపించారు. పేద కుటుంబాలకు చెందిన వారి పెళ్లిళ్లతో పాటు మంత్రి కూతురు పెళ్లి జరగడంతో రాష్ట్ర ముఖ్యమంత్రి సిద్ధరామయ్యతో పాటు మంత్రివర్గ సహచరులు, పలువురు మఠాధీశులు హాజరై నూతన వధూవరులను ఆశీర్వదించారు. సామూహిక వివాహాల్లో ఒక్కటైన జంటలకు ఒక్కొక్కరికీ ఒక్కో జెర్సీ ఆవును మంత్రి అంజనేయ కానుకగా అందించారు.

జి.మనోహర్