ఢిల్లీలో మరో నిర్భయఘటన.. మహిళపై అత్యాచారం, హత్య

Posted: 01/11/2015 11:34 AM IST

32 year old woman found dead in south delhi rape suspected

దేశ రాజధాని ఢిల్లీలో మరో దారుణం జరిగింది. రెండేళ్ల క్రితం జరిగిన నిర్భయ ఘటన తలపించే మరో అకృత్యం చోటు చేసుకుంది. సుమారు 30 ఏళ్ల మహిళపై మగమృగాళ్లు పైశాచికంగా అత్యాచారానికి పాల్పడి, హత్య చేశారు. కాళ్లు, చేతులు కట్టివేసి ఉన్న ఆమె మృతదేహం ఢిల్లీలోని వసంత్ కుంజ్ ప్రాంతంలో బయటపడింది. మృతురాలిపై అత్యాచారానికి పాల్పడిన అనంతరం హత్య చేసి ఉంటారని తెలుస్తోందని పోలీసులు తెలిపారు.

బాధితురాలిపై కక్ష పెట్టుకున్నవారే ఈ దారుణానికి పాల్పడినట్టు ప్రాథమికంగా తెలుస్తుంది. బాధితురాలిపై అత్యంత పైశాచికంగా లైంగికదాడికి పాల్పడి, ఆమె రహస్య భాగాల్లోకి వస్తువులను చొప్పించారు. ఆమె కాళ్లు, చేతులు కట్టివేయడంతో పాటు, మెడ చుట్టూ వస్త్రంతో చుట్టి ఉంది. ఈ ఘటనకు సంబంధించిన ముఖ్యమైన ఆధారాలు లభించాయని, దీని వెనుక బాధితురాలి స్నేహితులు ఇద్దరు ముగ్గురు ఉండి ఉంటారని భావిస్తున్నట్లు పోలీసులు చెప్పారు.

అయితే వారి వివరాలు వెల్లడించడానికి మాత్రం నిరాకరించారు. దక్షిణ దిల్లీలోని సుల్తాన్‌పూర్‌కు చెందిన ఆమెకు భర్త, ముగ్గురు పిల్లలు ఉన్నారు. స్థానికంగా ఓ వర్క్‌షాపులో టైలర్‌గా పనిచేస్తుంది. ఆమె భర్త గతంలో ప్రమాదంలో తీవ్రంగా గాయపడడంతోబాధిత మహిళే ఆ ఇంటిని పోషిస్తోంది. శుక్రవారం విధుల్లోకి వెళ్లిన ఆమె కనిపించకుండా పోయింది. ఆమె ఆచూకీ దొరక్కపోవడంతో బాధితురాలి భర్త పోలీసులకు ఫిర్యాదు చేశారు. శనివారం ఉదయం వసంత్ కుంజ్ ప్రాంతంలోని పొదల్లో ఉండగా కాపలా సిబ్బంది గుర్తించి పోలీసులకు సమాచారం ఇచ్చారు.

జి.మనోహర్