చిత్తూర్ కలెక్టరేట్ ముట్టడికి తమిళులు.. వైగో ప్రకటనతో మరింత వేడి

Posted: 04/10/2015 08:46 AM IST

తమిళనాట ఎన్ కౌంటర్ పై ఆగ్రహ జ్వాలలు అంతకంతకు పెరుగుతున్నాయి. మొన్న ఏకంగా ఆర్టీసీ బస్సులను ధ్వంసం చేసిన తమ నిరసనలు తెలిపితే.. నిన్న చంద్రబాబు నాయుడు దిష్టి బొమ్మలను దహనం చెయ్యడం, హెరిటేజ్ వ్యాపార సంస్థలపై దాడులు చెయ్యడం చేశారు. అయితే తాజాగా శేషాచలం ఎన్ కౌంటర్ ను నిరసిస్తు చిత్తూరు జిల్లా కలెక్టరేట్ ను ముట్టడించాలని తమిళ పార్టీ ఎండీఎంకే నేత వైగో పిలుపునిచ్చారు. దాంతో ఏపిలోనూ, తమిళనాడులోనూ వేడి మొదలైంది. వైగో ప్రకటనతో ఎలాంటి పరిణామాలు చోటు చేసుకుంటాయా అని సర్వత్రా ఉత్కంతట నెలకొంది. అయితే చిత్తూరు జిల్లాలో పోలీసులు అడుగడుగు జల్లెడ పడుతున్నారు. తమిళనాడు నుండి వస్తున్న ప్రతి వాహనాన్ని తనిఖీ చేస్తున్నారు. అనుమానం వచ్చిన వారిని అదుపులోకి తీసుకుంటున్నారు. అటు వైగో మాత్రం రెండు వేల మందితో చిత్తూరు కలెక్టరేట్ ను ముట్టడిస్తామని ప్రకటించడంతో పోలీస్ యంత్రాంగం అప్రమత్తమైంది.

తమ వారి మృతికి కారణమైన ఏపి ముఖ్యమంత్రి నారా చంద్రబాబు నాయుడిపై నిన్న తమిళనాడులో ఆగ్రహ జ్వాలలు వ్యక్తమవుతున్నాయి. చంద్రబాబు నాయుడు ఫోటోలను చెప్పులతో కొట్టడం, చంద్రబాబు దిష్టి బొమ్మలను దహనం చెయ్యడం లాంటివి తమిళనాడులో చాలా చోట్ల చొటుచేసుకున్నాయి. తాజాగా ఏపీ సీఎం చంద్రబాబుకు చెందిన హెరిటేజ్ సంస్థపై తమిళ సంఘాలు దాడి చేశాయి. తమిళనాడు రాష్ట్రం మహిళాపూర్ శివారు ప్రాంతంలో ఆందోళనకారులు విధ్వంసం సృష్టించారు. హెరిటేజ్ వస్తువులు ఎవరు కొనుగోలు చేయవద్దంటూ నినాదాలు చేశారు. మొత్తానికి ఏపి ఎన్ కౌంటర్ కీలక మలుపులు తిరుగుతోంది. తమిళనాడు, ఏపిల మధ్య బస్సుల రాకపోకలు నిలిచిపోయాయి. గత నాలుగు రోజులుగా రెండు రాష్ట్రాల బోర్డర్ ల వద్ద కూడా ఉద్రిక్త వాతావరణం నెలకొంది. ఎఫ్పుడు ఏం జరుగుతుందో అని పోలీసులు, సామాన్య ప్రజలు టెన్షన్ పడుతున్నారు.

- అభినవచారి