లఖ్వీ అంశంపై ఐక్యరాజ్యసమితిలో భారత్ కు వ్యతిరేకంగా చైనా..

Posted: 06/23/2015 10:05 PM IST

డ్రాగన్‌ దేశం తర వక్ర బుద్ధిని మళ్లీ చాటింది. పాకిస్తాన్‌కు చైనా మరోసారి అండగా నిలిచింది. ఐక్యరాజ్య సమితిలో భారత్‌కు వ్యతిరేకంగా వ్యవహరించింది. ముంబై నరమేధానికి సూత్రధారి అయిన లఖ్వీ పాకిస్తాన్‌లో విచ్చలవిడిగా తిరుగుతున్నాడు. ఇస్లామాబాద్‌ హైకోర్టు ఆదేశాలతో ఈ ఏడాది ఏప్రిల్‌లో రావల్‌పిండి జైలు నుంచి విడుదల అయ్యాడు. ఈ వ్యవహారంపై ఆగ్రహించిన భారత్‌ ఐక్యరాజ్య సమితిని ఆశ్రయించింది. ఉగ్రవాద సంస్థలపై సమితి చేసిన తీర్మానానికి వ్యతిరేకంగా లఖ్వీని విడుదల చేశారని విన్నవించింది. పాక్‌పై చర్యలు తీసుకోవాల్సిందిగా కోరింది.

ఈ మేరకు యుఎన్‌లో భారత శాశ్వత సభ్యుడు అశోక్‌ ముఖర్జీ ఐక్యరాజ్య సమితి ఆంక్షల కమిటీకి లేఖ రాశారు. ఈ నేపథ్యంలో పాకిస్తాన్‌ నుంచి ఆ కమిటీ విరణ కోరుతుందని అంతా భావించారు. అయితే ఆ ప్రయత్నాలకు చైనా అడ్డు తగిలింది. భారత్‌ సరైనా ఆధారాలు సమర్పించలేదన్న సాకుతో పాకిస్తాన్‌కు పూర్తి బాసటగా నిలిచింది. దాంతో భారత దేశం ప్రయత్నాలకు అడ్డుకట్ట పడింది. లఖ్వీ విడుదలపై అమెరికా, రష్యా, ఫ్రాన్స్‌, జర్మనీ తదితర దేశాలు ఇప్పటికే అభ్యంతరం వ్యక్తం చేశాయి. అతనిని మళ్లీ అరెస్టు చేయాలని అమెరికా డిమాండ్‌ కూడా చేసింది. అయినా పాక్‌ నుంచి స్పందన కరువయింది. పాక్‌కు చైనా అన్ని రకాలుగా మద్దతు పలుకుంది. ఇప్పుడు ఐరాసలోనూ చైనా తన వక్ర బుద్ధిని చాటుకుంది.

జి. మనోహర్