బాలీవుడ్ లో ‘బాహుబలి’ సరికొత్త రికార్డు

Posted: 08/03/2015 06:39 PM IST

Bahubali movie new record bollywood 100 crores club karan johar rajamouli

దర్శకధీరుడు రాజమౌళి చెక్కిన అద్భుతశిల్పం ‘బాహుబలి’ ఘనవిజయం సాధించి ఇప్పటికే ఎన్నో రికార్డులను తన ఖాతాలో వేసుకుంది. తెలుగు, తమిళ, మలయాళ, హిందీ.. ఇలా నాలుగు భాషల్లో విడుదలైన ఈ చిత్రం అన్నిరంగాల్లో బాక్సాఫీస్ రికార్డులను బద్దలు కొట్టేసింది. ప్రపంచవ్యాప్తంగా రూ.500 కోట్లు కలెక్ట్ చేసిన మొదటి ప్రాంతీయ చిత్రంగా చరిత్ర సృష్టించిన ఈ చిత్రానికి మరో ఘనత వచ్చి చేరింది.

హిందీలో విడుదలైన ఈ ‘బాహుబలి’ చిత్రం.. వందకోట్ల రూపాయలు వసూళ్లు సాధించిన తొలి డబ్బింగ్ సినిమాగా నిలిచింది. బాలీవుడ్ ప్రముఖ దర్శకనిర్మాత కరణ్ జోహర్ ఆధ్వర్యంలోని ‘ధర్మా ప్రొడక్షన్స్’ బ్యానర్ పై విడుదలైన ఈ చిత్రం.. వందకోట్ల క్లబ్ లోకి చేరింది. విడుదలైన నాలుగు వారాల్లో ఈ చిత్రం 103.51 కోట్ల రూపాయల వసూళ్లు సాధించిందని ట్రేడ్ అనలిస్టులు తెలిపారు. ఇంకొక విశేషం ఏమిటంటే.. బాలీవుడ్ కండలవీరుడు సల్మాన్ ఖాన్ నటించిన ‘బజరంగీ భాయ్ జాన్’ చిత్రం బరిలో వున్నప్పటికీ.. ‘బాహుబలి’ వసూళ్లలో ఏమాత్రం మార్పు రాలేదు. తొలివారంలోనే 40 కోట్లు కలెక్ట్ చేసిన ‘బాహుబలి’.. ఆ తర్వాత సల్మాన్ చిత్రం వచ్చినప్పటికీ మంచి కలెక్షన్లతో 100 కోట్ల క్లబ్ లోకి చేరిపోయింది.

‘బాహుబలి’ వందకోట్ల క్లబ్ లోకి చేరడంతో కరణ్ జోహర్ దర్శకుడు బాహుబలిని ప్రశంసలతో ముంచెత్తారు. రాజమౌళి ఈ సినిమాని ఎంతో అద్భుతంగా తెరకెక్కించారని, ప్రేక్షకులకు ఓ సరికొత్త ప్రపంచాన్ని కనువిందు చేశారని అతడు పేర్కొన్నాడు. ఇతర ఇండస్ట్రీల్లోనూ అక్కడి ప్రాంతీయ సినిమాలు రిలీజవుతున్నప్పటికీ.. ‘బాహుబలి’ మాత్రం రికార్డుల పరంపరను కొనసాగిస్తూ.. ప్రొడ్యూసర్లకు కాసుల వర్షం కురిపిస్తోంది.