ఆ జైల్ లోకి డ్రగ్స్ గాలిలో ఎగురుకుంటూ వెళ్లాయి

Posted: 08/25/2015 04:26 PM IST

అవును.. మీరు చదివింది నిజమే. అనగనగా ఓ జైలు ఆ జైలులో చాలా మంది ఖైదీలు. అయితే వారందరికి కావాలసిన అన్ని వస్తువులు అలా గాలిలో ఎగురుకుంటూ వచ్చేస్తాయి. డ్రగ్స్ కావచ్చు లేదంటే తుపాకులు కావచ్చు అవీ కాదంటే పోర్న్ సీడీలు, వీడియోలు కావచ్చు అలా గాలిలో ఎగురుకుంటూ ఎంచక్కా ఖైదీలకు చేరుకుంటాయి. ఎక్కడా ఎలాంటి అడ్డంకి ఉండదు. ఎవరూ ఎలా వస్తున్నాయని అడ్డుకునే పరిస్థితి కూడా ఉండదు. ఇదంతా ఏదో సినిమాల్లో జరిగే అడ్వెంచరస్ సీన్ లాగా కనిపిస్తుందేమో కానీ ఇది అక్షరాల జరిగిన నిజం. అమెరికాలోని ఓ జైలులో జరిగిన యదార్థ ఘటన అందరికి ఆశ్చర్యాన్ని కలిగిస్తోంది. క్రిమినల్ మైండ్ టెక్నాలజీని ఎలా వాడతారో.. వాడితే ఎలా ఉంటుందో చూసి అవాక్కవ్వండి.

అమెరికాలోని మేరీలాండ్ జైల్ లో చాలా మంది ఖైదీలు వివిధ రకాల శిక్షలు అనుభవిస్తున్నారు. అయితే అక్కడ ఉండేదే క్రిమినల్స్.. వాళ్లు అంతకు ముందే రకరకాల నేరాలు చేసి జైలకు వచ్చి ఉంటారు. అయితే వారికి అన్ని అవసరాలు జైలులో తీరవు కాబట్టి బయటి నుంచి అక్రమంగా రకరకాల వస్తువులను తెప్పించుకుంటున్నారు. జైలు బయటి నుండి డ్రగ్స్, తుపాకులు, పోర్న్ సిడీలు, డివిడిలు డ్రోన్ ద్వారా పంపిస్తు పట్టుబడ్డారు ఇద్దరు కేటుగాళ్లు. జైలు బయటి నుండి ఖైదీలకు ఏం కావాలో తెలుసుకొని మూడో కన్నుకు తెలియకుండా డ్రోన్ ద్వారా అలా గాలిలో అవసరాలను పంపిచేశారు. జైలులో ఎంత టైట్ సెక్యూరిటీ ఉన్నా కానీ డ్రోన్ సహాయంతో వారి అవసరాలను అలా తీర్చేసే.. మహా మోసగాళ్లను పోలీసులు అరెస్టు చేశారు.