రాక్షసుడిగా మారిన చంద్రబాబు

Posted: 10/26/2015 01:53 PM IST

ఏపి సిఎం నారా చంద్రబాబు నాయుడు మీద వైయస్ జగన్ మరోసారి విరుచుకుపడ్డారు. ఏపి నూతన రాజధాని అమరావతి గ్రామాల్లో పర్యటించిన జగన్.. అగ్నికి ఆహుతైన చెరుకు పంట పొలాన్ని పరిశీలించారు. బాధిత రైతు చంద్రశేఖర్ ను ఓదార్చారు. ల్యాండ్ పూలింగ్ లో భూములు ఇవ్వము అన్న పాపానికి పొలాలు తగులబెడతారా అని జగన్ ప్రశ్నించారు. ఇదంతా సీఎం ఆదేశాలు మేరకే జరుగుతోందని ఆయన ఆరోపించారు. చంద్రబాబు ఆదేశిస్తే మంత్రులు పాటిస్తున్నారని ధ్వజమెత్తారు.

ఒక వేళ ముఖ్యమంత్రికి కాని ఆయన మంత్రులకు సంబంధించిన భూములు ఇలానే లాక్కుంటే ఒప్పుకుంటారా అని జగన్ ప్రశ్నించారు. బలవంతంగా భూములు లాక్కుంటే ఆ బాధ ఏంటో వారికి తెలుస్తుందన్నారు. ఏపీలో దారుణమైన ఘోరాలు జరుగుతున్నాయని జగన్ ఆవేదన వ్యక్తం చేశారు. అసలు బీహార్ లో కాదు..ఏపీలో జంగిల్ రాజ్ ఉందన్నారాయన. ఒకసారి బీహార్ ప్రజలు ఇక్కడికి వచ్చి చూస్తే.. మాకన్నా అన్యాయమైన రాష్ట్రం ఇంకొకటి ఉందని వారు చాలా ఆనందపడతారని జగన్ అన్నారు. అధికార మదంతో చంద్రబాబు రాక్షసుడిగా మారారని జగన్ ఫైర్ అయ్యారు. అధికారం శాశ్వతం కాదని, మానవత్వం ప్రదర్శించాలని హితవు పలికారు.